Falece unha persoa tras ser atropelada por un turismo en Brión
Dúas persoas resultaron feridas nunha saída de vía en Lousame
Un home duns 50 anos faleceu tras ser atropelado por un turismo na AC-304, en Soigrexa, no municipio de Brión (comarca de Compostela).
Segundo informou o 112, o suceso produciuse minutos antes das 5.00 horas deste sábado e foi o propio condutor do vehículo o que deu a voz de alarma.
A central de emerxencias mobilizou aos profesionais de Urxencias Sanitarias da Galiza-061, que comunicaron o falecemento da persoa, e á Garda Civil.
Saída de vía en Lousame
Dúas persoas resultaron feridas tras unha saída de vía na DP-1105, á altura da parroquia de Tállara, en Lousame (comarca de Noia).
Segundo informou o Consorcio Contra Incendios e de Salvamento da Coruña, o suceso produciuse sobre as 17.00 horas da sexta feira no quilómetro 4,5 da vía.
A saída de vía produciuse pola marxe esquerda, en dirección Boiro (O Barbanza), e o turismo quedou envorcado sobre o teito na beirarrúa. Ademais, o coche impactou contra un poste de corrente que quedou tirado na estrada e cortou os dous sentidos de circulación.
Até o punto desprazáronse os Bombeiros de Boiro, o GES de Noia e a Garda Civil.