Falece o sancristán de Carballo ao que lle caeu enriba a imaxe dun santo
Faleceu o sancristán da igrexa do centro do municipio de Carballo (comarca de Bergantiños) que resultara ferido grave este sábado ao sufrir unha indisposición e caerlle enriba unha imaxe dun santo.
O home, de 78 anos e veciño de Coristanco, foi trasladado en helicóptero medicalizado ao Complexo Hospitalario Universitario da Coruña (Chuac), onde estivo ingresado e faleceu na mesma xornada.
O suceso produciuse sobre as 13.25 horas deste sábado e foi Urxencias Sanitarias quen alertou o 112 da incidencia e do desprazamento da aeronave para o seu traslado. Foron avisados tamén Policía Local e Protección Civil, entre outros.
O sancristán foi evacuado desde a igrexa de San Xoán, onde tivo lugar o tráxico accidente até o parque de San Martiño, onde aterrou o helicóptero para evacualo.