A falta de vivenda en aluguer acurrala as estudantes: "Angustia máis o piso que a carreira"

Malia a importante caída de estudantado universitario nos últimos anos —consecuencia da baixada da natalidade, entre outros factores—, aínda sipón un número importante: nas tres universidades galegas abeiran os 50.000. É case a metade que no ano 2000, cando eran máis de 90.000, pero segue a ser unha cifra considerábel: serían a oitava cidade da Galiza. Unha parte importante destas universitarias e universitarios viviron estes meses co afogo de atopar ou renovar vivenda para pasar o curso. Na Galiza, a oferta pública de prazas en residencias e colexios maiores apenas chega ás 2.000. Un dato: só en Compostela ao redor de 2.400 alumnas e alumnos ficaron sen praza nas residencias da universidade. No conxunto da Galiza, só dous de cada cen universitarios teñen acceso a residencias públicas. Con esta escaseza de oferta de prazas públicas imponse a necesidade de atopar un piso para alugar. Mais isto, cada ano que pasa, é máis difícil, algo que recoñece o propio estudantado e tamén o sector inmobiliario. O motivo? A escaseza de vivendas no circuíto comercial do aluguer, que vén desde hai tempo, e os prezos desorbitados. “Están todos a prezos bastante altos. A maioría atópanse ao redor de 900 euros ou incluso máis e sen ser ningún palacio”, afirma a Nós Diario Paula García, estudante na Universidade de Santiago de Compostela (USC). A súa compañeira, Alba Queiruga, que estuda Relacións Laborais, critica ademais o estado dalgúns dos inmóbeis que se ofertan. "O que non alugan a outra xente, porque saben que non llos van coller do estragados que están, arréndanos a estudantes". Oferta e demanda A oferta de vivenda en aluguer reduciuse á metade en catro anos. Está hoxe en mínimos con só 2.780 propiedades dispoñíbeis no circuíto comercial, fronte ás perto de 6.000 que computaba o sector en 2020. Segundo a Federación Galega de Empresas Inmobiliarias, a principios de verán Vigo tiña 420 vivendas para alugar, A Coruña 350, Ourense 180, Compostela175, Lugo 120, Pontevedra 100 e Ferrol 90. Unha cifra que permite facerse unha idea da dificultade do estudantado para conseguir un ben tan escaso. E a isto súmase a escalada de prezos de arrendamento. En agosto —en comparación co mesmo mes de 2023— o incremento foi de case 10% en Compostela, mentres en Vigo e A Coruña, cidades tamén sedes universitarias, ese aumento foi de 11% e 11,5% respectivamente. "O prezo da vivenda na Galiza está disparado e afecta directamente ao estudantado", recoñece Artai Gavilanes, responsábel de organización de Erguer, Estudantes da Galiza, que esta mesma semana presentou unha campaña centrada na problemática da vivenda que decorrerá durante todo o mes de setembro e que finalizará cunha folga estudantil a cuarta feira 2 de outubro. "O aluguer é para moitas estudantes o principal gasto á hora de acceder ao ensino superior", denuncian. Para reverter a situación, propoñen tres medidas concretas para aliviar a presión sobre a vivenda e o alumando universitario: a ampliación das prazas en residencias públicas, a creación dunha bolsa de vivenda pública para as estudantes e a limitación dos prezos de aluguer. "Eu pago ao redor de 250 euros por un piso compartido con outras dúas compañeiras", indica Ana Suárez, que estuda na Universidade de Vigo. "Pero a isto haille que engadir outros gastos, de comida, transporte ou material para o grao, etc... polo que aínda é unha cantidade importante ao mes se es dunha familia traballadora". Mais conseguir vivenda e facer fronte ao prezo non é o único problema do estudantado que ten que recorrer ao arrendamento. En non poucas ocasións, está o tipo de piso no que —ante a falta de alternativas— teñen que acabar pasando o curso. Unha queixa que se centra sobre todo en Compostela. Laura estuda no Campus compostelán e confesa que a situación da vivenda é "difícil" e que empeorou nestes anos. "Hai caseiros que alugan a estudantes o que non se atreverían arrendar a unha familia ou a xente que estea traballando, por exemplo. Pisos vellos, sen remodelar desde hai moitos anos, con humidade, con mobiliario e electrodomésticos do ano da pataca, case sen iluminación natural ...". As persoas consultadas coinciden en que as dificultades para vivenda aumentaron nestes últimos anos, ao tempo que se incrementaban prezos e mesmo exixencias dos propietarios. "Xa non é que pidan unha fianza, é que case piden un aval aos pais", apunta Laura. Coafga, o Colexio Oficial de Administradores de Fincas da Galiza, alertou de novo este curso de que moitos dos inmóbeis que se alugan a estudantes universitarios non reúnen as condicións adecuadas para habitar neles, ademais de teren un prezo moi elevado. Coafga lembra que os pisos deben ser aptos para o seu uso e reunir unhas condicións mínimas de habitabilidade..