Galiza inicia a semana de Nadal con 15.856 casos activos de Covid-19 tras 1.331 novos contaxios
Galiza inicia a semana de Nadal con 15.856 casos activos de Covid-19, que supoñen medio milleiro máis que o día anterior, despois de rexistrarse 1.331 novos contaxios -26 menos que a xornada pasada-. Os pacientes ingresados por este coronavirus aumentan a 292 -dez máis- e a taxa de positividade dispárase ao 18,74%.
Segundo os datos publicados na mañá desta segunda feira pola Consellaría de Sanidade con rexistros até as 18 horas deste domingo, mantéñense 51 persoas ingresadas en UCI pola Covid-19 en Galiza -sen cambios- e aumentan a 241 as hospitalizadas noutras unidades -dez máis-, mentres que 15.564 pacientes atópanse en seguimento nos seus domicilios.
A presión hospitalaria aumenta en cinco das sete áreas sanitarias; mantense sen cambios na de Lugo con seis pacientes Covid en UCI e 11 noutras unidades; e alíviase na de Vigo, que rexistra 21 ingresados en críticos -un menos- e 77 noutras unidades -dous menos-.
A semana de Nadal comeza con medio milleiro de casos máis de Covid-19 que o día anterior, ao se situar en 15.856 no conxunto de Galiza -508 máis-, ao haber máis contaxios (1.331) que altas (821), ao que se engaden dous falecementos. A segunda feira da semana pasada -o 13 de decembro- as infeccións sumaban 12.221.
As infeccións activas ascenden en seis das sete áreas sanitarias galegas, coa de Vigo á cabeza (+231), seguida da de Santiago e Barbanza (+133); Pontevedra e O Salnés (+120), A Coruña e Cee (+43), Lugo (+35) e Ferrol (+12), mentres que na de Ourense descenden (-66).
Segundo os últimos datos actualizados polo Ministerio de Sanidad na tarde desta pasada sexta, 17 de decembro, Galiza conta cunha taxa a 14 días de 511,95 casos por 100.000 habitantes, polo que segue a incidencia lixeiramente por riba da media do Estado, que está en 511.
Os novos contaxios de Covid-19 mantéñense por encima dos 1.300 por segunda xornada consecutiva ao situarse en 1.331, que supoñen 26 menos que os 1.357 rexistrados o domingo -que supuxeron a cifra máis alta do que vai de sexta onda-.
En canto á taxa de positividade das probas PCR -número de infeccións detectadas cada 100 test-, comeza esta semana cun repunte ao 18,74%, fronte ao 12,54% do día anterior. Por tanto, mantense por encima do limiar do 5% que fixa a Organización Mundial da Saúde (OMS) para dar por controlada a pandemia.
As persoas falecidas diagnosticadas con Covid-19 desde o inicio desta pandemia no conxunto de Galiza aumentan a 2.722, ao notificar este domingo a Consellería de Sanidade dous novos óbitos.