A Galiza abeira mil novos contaxios máis e suma perto de 10.700 casos activos

A Galiza rexistrou outros 988 novos contaxios de Covid, que supoñen 46 menos que os da xornada anterior, mentres que os casos activos seguen en aumento e sitúanse en 10.677, que implican 473 máis. Os pacientes hospitalizados por este coronavirus aumentan a 260, catro máis.

Segundo os datos publicados pola Consellería de Sanidade con rexistros até as 18 desta quinta feira, aumentan a 42 as persoas ingresadas en UCI pola Covid-19 na Galiza, cinco máis e descenden a 218 as hospitalizadas noutras unidades, unha menos, mentres que 10.417 pacientes atópanse en seguimento nos seus domicilios.

Presión hospitalaria

A presión hospitalaria aumenta nas áreas sanitarias de Vigo, Santiago e Pontevedra; alíviase nas de Ourense, Lugo e Ferrol e mantense sen cambios na da Coruña.

En concreto, na área de Vigo aumentan a 18 os pacientes Covid en UCI, dous máis, e a 69 os ingresados noutras unidades, seis máis; mentres que na de Santiago soben a catro o críticos e a 10 os hospitalizados noutras unidades.

Na área de Pontevedra ascenden a cinco os pacientes ingresados en UCI pola Covid, dous mái e increméntanse a 38 os doutras unidades, tres máis. Pola súa banda, na de Ourense seguen sete en críticos e descenden a 56 os doutras unidades, seis menos.

Pola súa banda, na área de Lugo continúan catro pacientes Covid en UCI e descenden a nove os ingresados noutras unidades, tres menos; mentres que a de Ferrol é a única sen hospitalizados en críticos e rexistra 16 noutras unidades, dous menos.

E a área da Coruña mantense sen cambios, con catro pacientes ingresados en UCI pola Covid-19 e con 20 noutras unidades de hospitalización.

Casos en aumento

Os casos activos de Covid seguen en aumento na Galiza e ascenden a 10.677, que supoñen 473 máis que a xornada anterior.

En concreto, as infeccións activas aumentan en todas as áreas sanitarias galegas salvo na de Ferrol (-2), na que descenden lixeiramente. No resto, soben coa de Vigo á cabeza (+217); seguida da da Coruña (+105), Pontevedra (+71), Ourense (+52), Santiago (+22) e Lugo (+8).

Así, con máis casos activos mantense a área de Vigo, con 3.352; seguida da de Ourense, con 2.550; A Coruña, con 1.472; Pontevedra, con 1.465; Lugo e Santiago, con 704 en cada caso; e á cola continúa a de Ferrol, con 430.

Segundo os último datos actualizados polo Ministerio de Sanidade, a Galiza conta cunha taxa a 14 días de 365,27 casos por 100.000 habitantes, polo que segue a incidencia por encima da media de España, que está en 305,57.

Contaxios

Pola súa banda, os novos contagios de Covid experimentaron un lixeiro descenso con respecto á xornada anterior, con 988, que supoñen 46 menos que os 1.034 desta quinta. Son, con todo, 169 máis que hai unha semana. Vigo sumou 379; Ourense, 172; A Coruña, 162; Pontevedra, 119; Lugo, 60; Santiago, 58; e Ferrol, 38.

A taxa de positividade das probas PCR supera 11% a 11 días, por riba de 5% fixada pola Organización Mundial da Saúde.

Falecementos

As persoas falecidas diagnosticadas con Covid desde o inicio desta pandemia na Galiza aumentan a 2.693, ao notificar a Consellería de Sanidade tres óbitos.

En concreto, trátase de tres mulleres que presentaban patoloxías previas e atopábanse hospitalizadas. Dous dos decesos, de mulleres de 72 e 82 anos producíronse o mércores no CHUVI.

O outro falecemento notificado este xoves tivo lugar este mesmo 9 de decembro, cando unha muller de 86 anos morreu mentres se atopaba ingresada no CHUF.