A Galiza rexistrou o outono máis cálido e máis húmido da serie histórica

A Galiza rexistrou o outono máis cálido e máis húmido da serie histórica, segundo o avance do informe climatolóxico elaborado por Meteogalicia.

Este período caracterizouse por temperaturas elevadas ao longo dos tres meses, mais de forma destacada en outubro, que, de feito, foi "extremadamente cálido", mentres que tanto setembro como outubro foron "moi cálidos".

Así, a temperatura media, obtida a partir dos datos rexistrados en 11 estacións meteorolóxicas representativas, foi de 16,4 graos, cunha anomalía de 1,9 graos. Más detalladamente, a temperatura mínima tivo unha desviación respecto ao valor climatolóxico de 2,4 graos e, no caso da temperatura máxima, a anomalía media foi de 1,4 graos.

Os valores máis altos, comprendidos entre 17,4 e 17,8 graos, rexistráronse no Miño de Ourense e nas Rías Baixas e nos arredores do Golfo Ártabro. Pola contra, as temperaturas máis baixas, ao redor dos 10 graos, rexistráronse nas Serras do Eixe e de Queixa, macizo de Manzaneda e en Pena Trevinca.

Precipitacións

Sobre as precipitacións, foi un outono extremadamente húmido despois de rexistrarse, nas 16 estacións que compoñen a serie rexional, unha media acumulada de 797 l/m2, o que representa 93% máis do establecido no período de referencia.

Segundo destacou a Xunta da Galiza nunha nota de prensa, isto debeuse principalmente ás choivas xeneralizadas e persistentes dos meses de outubro -o segundo máis húmido de toda a serie histórica, despois do de 1987- e novembro, nos que as precipitacións estiveron moi por riba dos valores climáticos esperados. Nesta liña, subliñou que o mes de setembro caracterizouse por ser húmido e os dous restantes foron moi húmidos.

As serras litorais e setentrionais e as zonas montañosas de Lugo e Ourense rexistraron os valores máis altos de precipitacións, entre 1.350 e 1.600 l/m2 , mentres que os máis baixos, entre 350 e 500 l/m 2, corresponden ao litoral da Mariña e aos vales dos ríos Casaio e Támega.