Gran despregamento ante un incendio nunha nave de subministracións agrícolas en Tomiño

Un incendio calcina na tarde deste sábado unha nave industrial de subministracións agrícolas situada en Amorín, municipio de Tomiño (Baixo Miño). A Xunta da Galiza activou o Plan de Emerxencias Territorial da Galiza (Platerga).

A alcaldesa de Tomiño, Sandra González, explica que se desprazou até o lugar onde actúa un gran despregamento operativo para apagar o incendio, cunha decena de camións de bombeiros. Así, relata que "non hai feridos, só danos materiais", mais "está moi queimada a nave". O lume chegou a "unha pequena zona forestal" adxacente.

O incendio queima subministracións de plásticos e abono, cunha aparatosa columna de fume visíbel en varios quilómetros á redonda. Foron varias as persoas particulares as que deron a alerta ao 112 sobre as 15.50 horas.

Despregamento

A Xunta activou o Platerga para garantir a coordinación entre organismos ante a situación de risco. Participan nos operativo bombeiros do Baixo Miño, do Morrazo e do Salnés, así como portugueses de Caminha e Valença.

Tamén se avisou ao GES da Guarda e de Mos, medios do Servizo de Extinción de Incendios, Garda Civil e Protección Civil. Fontes da Consellaría do Medio Rural indican que se trasladaron dúas motobombas, dúas brigadas e un axente como apoio no operativo.

Corte na estrada

Pasadas as 19 horas, o 112 indicaba que os equipos de extinción manteñen o incendio perimetrado, aínda que "por momentos colle forza nos puntos onde se atopan os produtos fertilizantes". Ademais, debido ao lume, foi necesario interromper a circulación de vehículos por un carril na estrada PO-552 (Vigo-Tui), no quilómetro 66.