Un incendio arrasa 40 hectáreas en Cea
O incendio forestal declarado esta terza feira en Cea (comarca do Carballiño), que se orixinou arredor das 16.24 horas na parroquia de Oseira, foi estabilizado no mediodía desta cuarta feira, segundo a última información trasladada por fontes da Consellaría do Medio Rural.
Inicialmente afectou unha superficie próxima ás 20 hectáreas, malia que o último dato achegado a primeira hora por este departamento da Xunta da Galiza sitúa o total en 40 hectáreas.
Para o seu control mobilizáronse, ademais de persoal como técnicos, axentes e brigadas, materiais como motobombas, pas, avións e helicópteros; oito, inicialmente, en cada caso.
Ademais dos medios despregados por Medio Rural, nos labores de extinción participou unha dotación de bombeiros naturais de Estonia que están en formación e para os que este era o seu primeiro incendio.
Este grupo de 20 bombeiros chegou á Galiza o pasado 25 de xullo para realizar adestramentos e regresará ao seu país o próximo día 30.