Instan Política Social a investigar "a corrupción" no servizo de inspección

"A investigación fechouse en falso, con falsas conclusións, non se buscou en ningún momento esclarecer a verdade dos feitos, senón o lavado de cara da Consellaría de Política Social". 

Así valoran o "fechamento en falso" da investigación ou actuacións previas á iniciación dun expediente disciplinario contra os inspectores denunciantes das malas prácticas e a "corrupción interna" na Consellaría de Política Social desde o Movemento Galego pola Defensa das Pensións e os Servizos Públicos (Modepen), Traballadoras de Residencias da Galiza (Trega) e a Asociación Galega de Usuarias e Familiares de Residencias da Terceira Idade Vellez Digna. 

Segundo denuncian estes colectivos, durante a investigación desenvolvida polo Executivo galego, "non se chamou a declarar a ningunha traballadora nin a ningún familiar, usuarias, pensionistas ou asociacións" de veciñanza que denunciaron os "chivatazos" das datas en que a Xunta da Galiza inspeccionaría as residencias de maiores.

"Sabiamos que non ían atopar nada, porque, cales serían as conclusións se fose o raposo o que investigase quen matou as galiñas?", ironizan. 

Reabrir a investigación

Para Modepen, Trega e Vellez Digna, a Consellaría busca facer "inoperativo" o servizo de inspección para "garantir a impunidade" de empresas nas que, "a miúdo, se producen graves vulneracións dos dereitos humanos", afirman pondo de exemplo os horarios de Inspección.

"Traballan só de 8 a 15 horas de segunda a sexta feira, cando o normal sería estabelecer horarios especiais que inclúan períodos críticos como noites e fins de semana", valoran. 

Así, as usuarias e as familias instan a conselleira, Fabiola García, a reabrir unha investigación "de verdade" sobre as filtracións que se producen desde o departamento que dirixe.