Localizado sen vida un home de idade avanzada nun illote do río Miño en Arbo

Un home de idade avanzada foi localizado sen vida nas últimas horas nun illote no río Miño, no municipio de Arbo (A Paradanta), segundo informou a central de emerxencias do 112-Galiza.

Segundo informaron os servizos de Emerxencias, un familiar informou de que o home faltaba desde primeira hora da tarde desta cuarta feira, cando saíra do seu domicilio para dirixirse cun tractor a un leira pegada ao río, onde adoitaba pescar, na parroquia de Cequeliños.

A alerta chegou ao 112 sobre as 22.50 horas, cando un particular informou de que o home non regresara aínda á casa. O 112 informou a Urxencias Sanitarias-061, á Garda Civil, ao GES de Ponteareas e mais ao servizo de Gardacostas da Galiza.

Foi a Garda Civil a que coordinou o operativo de procura, e a que localizou o falecido nun illote no medio do río. Ante as dificultades para levar a cabo un rescate acuático, polas fortes correntes do río, Gardacostas mobilizou o helicóptero Pesca I, que se encargou das tarefas de recuperación do corpo.