Mans arriba, isto é un atraco!

"Disparar con pólvora do rei": explica o fácil que é a utilización (ou o despilfarro sen control), de recursos alleos (públicos case sempre) O órgano que fiscaliza a xestión da Xunta, o Consello de Contas, realizou un informe demoledor para o "bo xestor" de Feijóo: a construción do Hospital Álvaro Cunqueiro de Vigo (que dá servizo a 600.000 persoas), tivo un sobrecusto de 470 millóns de euros! Enviarao ao Tribunal de Contas para abrir, ou non, un procedemento por "presuntas responsabilidades contables". O hospital fora promovido polo BNG e o PSdeG para sufragalo con cartos públicos mais Feijóo, en 2009, decidiu "privatizar" o proceso de construción... a 20 anos. Pódese permitir que un goberno utilice os cartos públicos para cometer esta desfeita? Máis gasto público, menos camas, menos metros cadrados de construción hospitalaria (a UTE contratada aforrou 11.912 millóns de euros, o equivalente a un orzamento anual da Xunta), e todo isto con financiamento público-privado, unha fórmula que xa fracasara no Reino Unido, València, etc. Impresentable! Hemeroteca A hemeroteca é demoledora para Feijóo: criticaba que "os políticos, que cobran un salario público, dos impostos dos cidadáns, se inauguran un hospital, a pregunta que debemos facernos é se o deixan pagado ou se temos que seguilo pagando, porque se é esta última, faga o favor de marchar rapidamente e empezar a pagalo". Vaia cara! Estaba taxado en 450 millóns de euros e custou 1.300, máis os aumentos do canon anual: de pagar 56,7 millóns en 20 anos, estamos pagando 86. A irresponsabilidade e a hipocrisía son evidentes... pero para eles dá igual! Sempre están moi a favor da empresa privada (neoliberalismo puro e duro) pero vivindo á custa dun salario público (máis o que veña…) e pagado polos cidadáns e cidadás. A pregunta que nos facemos todos é: por que non intervén a Fiscalía... ou un xuíz? Praza Pública (David Reinero) informa de que "as decisións tomadas en 2010-11 foron responsabilidade das ex conselleiras Pilar Farjas, conselleira de Sanidade entre 2009 e 2011, e Rocío Mosquera, xerente do Sergas nese período e despois conselleira ata 2015". E tanto Farjas como Mosquera (esta é a directora actual de Galaria, organismo que a través da súa Oficina Técnica de Seguimento tiña que fiscalizar o tema, polo que a Xunta se fiscaliza a si mesma) coinciden en empregar unha mesma xustificación a posteriori. Din: "Grazas ao novo hospital, planificado en 2011, a pandemia da Covid-19 que chegou á Galiza en 2020 non foi tan mala como podería ser". Así, sen anestesia, actuando como 'pitonisas'. Cos cartos públicos, claro! Outras alegacións peregrinas tampouco foron tidas en conta. A pregunta que nos facemos todos é: por que non intervén a Fiscalía... ou un xuíz? Total impunidade Que demostramos co exposto? Que a impunidade é total. Están a salvo do que fan. Ningunha responsabilidade por unha nefasta xestión para a saúde da poboación e para o futuro dos nosos fillos. Ademais, seguen utilizando as portas xiratorias: hoxe son responsables do Sergas e mañá, conselleiros, e logo alcalde de Baiona e logo... que pena... e con total impunidade! E todo isto sucede cando Galiza é a que menos inviste en servizos públicos fundamentais. Estamos á cola no gasto per cápita para sanidade, educación e política social. O Sergas gasta un millón de euros ao mes en pagar o complemento a médicos que traballan na pública e na privada. Cando Galiza é, con Andalucía, a que menos inviste en sanidade. Cando o gasto privado en sanidade dos galegos crece a 1.430 euros anuais de media. Aumento considerable dos seguros privados (lixo na maioría dos casos). Cando estamos moi por debaixo da media do estado en persoal médico e de enfermaría. Cando a CIG fala de "recuperar as subas salariais pendentes, recollidas no acordo retributivo de 2008-12 suspendido por Feijóo dun plumazo". Cando aínda lle debe equiparar o salario do persoal do Sergas co complemento específico que non cobra, e si o fai o outro persoal da Xunta da Galiza. E segue debendo tres días de LD que quitou pola cara. Os bos xestores aumentaron a débeda pública en 12.170 millóns de euros no ano 2023 (equivalente a un orzamento anual da Xunta). E que din os responsables políticos de hoxe? Que "se non se facía así, non se podería facer doutra forma". Vaia argumento que, sendo falso, é recorrente cando non se teñen argumentos, e que lle vale ao PP para lavar a cara e seguir financiando a empresa privada, co prexuízo evidente do ben máis prezado que temos: a nosa saúde!