Nepotismo no PP de Galicia

Nepotismo (RAG): práctica de quen abusa da influencia ou poder que ten, para dar cargos, prebendas, etc. a familiares e amigos. Un goberno, ten que gobernar para todos e todas. Non facelo así, leva consigo discriminacións, ilegalidades e nepotismo. Non é democrático. O Consello de Contas, expuxo o desastre da xestión de Feijóo co Hospital Álvaro Cunqueiro de Vigo. Cifrou en 470 millóns o custo adicional e preguntámonos: os contratos da Xunta do PP, son todos destas características? Favorécense intereses particulares, en detrimento da cidadanía? A Asociación Galega para a Defensa da Sanidade Pública denunciouno ante a xustiza galega e a Unión Europea "por vulnerar as condicións das propias institucións europeas, sobre o modelo de financiamento con diñeiro público e negocio privado". Este modelo, foi rexeitado pola poboación, que convocou multitudinarias manifestacións. Os custos do hospital seguen medrando. Foi construído e xestionado por unha sociedade mixta (por decisión de Feijóo nada máis chegar á Xunta) na que participou a empresa do seu propio conselleiro de Medio Ambiente, Territorio e Infraestructuras, Agustín Hernández. Do Álvaro Cunqueiro a Eulen Esta obra tivo un sobrecusto de 470 millóns de euros a pesar de reducir en máis dun 30% os recursos previstos no contrato inicial. Recortáronse 400 camas, e permitiron que seguise o concerto singular con Povisa, polo que pagamos 75 millóns de euros ao ano (800 millóns na última década). Rocío Mosquera, do Grupo Povisa, foi conselleira de Sanidade con Feijóo para articular co hospital privado o plan que protexe o concerto. E sabemos que Feijóo utiliza a sanidade privada, como vimos na súa recente intervención por desprendemento de retina. O Sergas admite que non é quen de asumir as listas de agarda de Ourense e prevé subcontratar operacións por 10 millóns de euros ao ano. A relación directa de contratos dados pola Xunta de Feijóo, primeiro, e Rueda, despois, son claros e manifestos de prácticas de nepotismo. O Sergas admite que non é quen de asumir as listas de agarda de Ourense e prevé subcontratar operacións por 10 millóns de euros ao ano Feijóo cede a xestión das residencias públicas á empresa Eulen, dirixida pola súa irmá, que as vende ao fondo francés propietario de DomusVi (de nefasta xestión nas Residencias Galegas durante a pandemia). Feijóo concedeulle 34 millóns de euros cando marcha para Madrid e designa Rueda presidente da Xunta (a dedo), para continuar coa mesma política de regar a súa familia con diñeiro público. Rueda adxudicou a Eulen outros 17 millóns en dous anos a base de concursos amañados e información privilexiada. A xestión da súa curmá, Eloína, foi nefasta. Primeiro na Xerencia de Ourense (que marchou case expulsada) e logo na Área Sanitaria de Compostela (onde en palabras da Xunta de Persoal "foi a peor xerente que se recorda"). En "agradecemento", agora, será subdirectora xeral de Envellecemento Activo e Prevención de Dependencia na Consellaría de Política Social (a dedo tamén). A empresa Universal Support, sen vinculación algunha co sector sanitario, cuxo director comercial é o cuñado de Feijóo, beneficiouse dos fondos anticovid da Xunta. Utilizou o call center de dita empresa como centro de información sobre a pandemia, poñendo ademais en risco a protección dos datos sanitarios das galegas. Pagos millonarios O Sergas, traslada cada verán a ambulancia medicalizada de Vilagarcía a Sanxenxo, alegando o "incremento de poboación polo turismo", cando a realidade é que Sanxenxo ten 24.302 habitantes menos no período estival, que a área sanitaria de Vilagarcía. A explicación a esta absurda decisión é que Sanxenxo ten un alcalde do PP e é o lugar de desfrute do emérito... En 2023 a Consellaría de Sanidade gastou máis de 37 millóns en pagar a multinacionais polo mantemento de equipos tecnolóxicos durante catro años: a Siemens Healthcare, 14,8 millóns de euros; a Philips Ibérica, 13,3 millóns e a General Electric Healthcare, 9,4 millóns. O 6 de agosto, o novo Conselleiro de Sanidade (que está facendo bos os anteriores) aprobou a contratación do servizo de mantemento de 17 equipos de aceleradores de radioterapia e de braquiterapia á empresa Varian por 18 millóns de euros durante cinco anos. Se isto é así na Consellaría de Sanidade, como será se sumamos as outras 11 consellarías (por exemplo, Rueda acaba de nomear directora xeral de Calidade Ambiental a muller do director territorial de ENCE). Que pena! Tanto a xustiza como o Parlamento de Galiza deben esixir responsabilidades sobre as relacións coa Xunta da irmá, a curmá, a parella o cuñado e "persoas amigas" do ex presidente galego e pór fin a política que tanto dano está facendo á sanidade pública e á poboación galega.