A oferta da finde vai desde os documentarios até a billarda
A fin de semana trae unha presada de ofertas para non perder. Velaquí as tendes.
- Sexta feira
Ciclo de documentários
Negreira
Auditorio do Centro Sociocultural
20.30h
Terceira cita do ciclo de documentarios Val de Barcala, coa proxección de Fíos Fóra e un posterior coloquio coas súas realizadoras. Trátase dunha peza audiovisual onde as protagonistas son as traballadoras galegas do sector téxtil. A actividade é gratuíta con entrada solidaria: recolleranse alimentos non perecedoiros que serán doados aos Servizos Sociais da comarca.
Ad Heyra Liti + Canela Cafuné
Vilar dos Santos
A Arca da Noe
Concerto de Canela Cafuné e Ad Heyra Liti, con pezas que van desde o soul ou o jazz, pasando polo pop e o rock até folk con influencias de músicas islandesas.
- Sábado
Pontevedra a pé
Pontevedra
Diante da casa do concello
12.30h
Cunca e Nécora, un roteiro para coñecer a zona monumental da cidade do Lérez, con información sobre o patrimonio, a gastronomía, o modelo de cidade e as historias que dela brotan. Ademais, tamén comezan os Minipaseos (19h, praza da Peregrina), unha alternativa destinada ao público miúdo que pretende dar a coñecer a cidade a través do teatro e a música.
Víctor Coyote, no Curruncho Pop
Carballo
Biblioteca Rego da Balsa
20.30h
Concerto con temas do seu último traballo, con versións en portugués de Roberto Carlos, Amália Rodrigues ou Jorge Ferreira, no marco do festival Curruncho Pop.
Allstar de Billarda en Laxe
Laxe
Praia de Laxe
12.00h
A Liga Nacional de Billarda volta a Laxe, recuperando este deporte tradicional e gozando da boa música con concertos de Druídas da Rolda, Ismael Pérez, Xenderal, etc.
II Feira do disco e libro galego
Monterroso
A Cúpula
10.30-21.30h
Obradoiros, actividades infantís en espazos integrados na feira, presentacións literarias e actuacións musicais... Unha xornada imprescindíbel que amalgama música e literatura.
- Sábado e domingo
Festival Atlántica
Compostela, Teo, A Coruña, Ferrol, Lalín, Vigo, Ourense, A Estrada
Varios lugares
A V edición do Festival Internacional de Narración Oral desprega un ano máis a súas redes de contos, enfiadas con historias para todas as idades.
- Domingo
Pegadas...
Narón
Café Teatro do Pazo da Cultura
19.00h
Unha peza teatral, unha historia construída a partir das pegadas literarias de Suso de Toro, Anxos Sumai, Pérez Galdós, Manuel Pazos, Eurípides e Laila Ripoll.