O Perte Saúde de Vangarda

"Oobxectivo xeral do Perte céntrase en fomentar a xeración sostible de tecido industrial remozado, resiliente e próspero, e a creación de emprego de calidade a través da colaboración público-privada bidireccional e cohesionada, orientado á protección da saúde colectiva e individual mediante un sistema de saúde de altas prestacións transformado dixitalmente.” Memoria explicativa do Perte Saúde de Vangarda, p. 30. O documento Perte Saúde de Vangarda (Proxecto Estratéxico para a Recuperación e Transformación Económica Para a Saúde de Vangarda) forma parte da política industrial na que se está a empeñar o actual Goberno. Pretende, tamén, dar unha proxección ao sistema sanitario de futuro, aínda que imos centrarnos no aspecto de política industrial, é dicir, dunha aposta pola “especialización intelixente” no sector industrial e tecnolóxico da saúde. A documentación dos proxectos de política industrial de Perte inclúe ademais outros sectores seleccionados nos que hoxe non imos entrar. O punto de partida, que claramente compartimos, consiste en considerar o sector da saúde –a atención sanitaria tamén, dende logo, pero aquí centrarémonos apenas no sector industrial e tecnolóxico, isto é, a invención e fabricación de fármacos, equipamento sanitario e aplicación da intelixencia artificial- de gran dinamismo e potencial de desenvolvemento económico e vangarda tecnolóxica, a partir de constatar a nosa capacidade científica e de investigación na sanidade. Pero esta capacidade atópase con grandes obstáculos para traducirse en procedementos industriais, e en desenvolver industrialmente os medicamentos e produtos que corresponden aos logros do I+D+I do país.... Isto limita gravemente a capacidade de especialización científico técnica e sobre todo industrial nos eidos nos que temos puntos fortes. Trátase de deseñar un proxecto estratéxico e un plan para acadalo. O documento parte de proclamar a dignidade do “Estado Emprendedor” (tan necesariamente defendido por Mariana Mazzucato) para apostar polo futuro industrial avanzado, con énfase na ciencia e na innovación. Ao respecto, o Perte SV, coñecendo a maior fraxilidade das interfaces I+D+I /industria, pon o acento na transferencia dende o I+D á empresa, en tres dimensións: a colaboración público-privada, as alianzas a prol da especialización intelixente no eido da industria sanitaria e a gobernanza dese proceso, alianza e colaboración: para o “desenvolvemento e creación de empresas competitivas baseadas na xeración de coñecemento”, “un Estado emprendedor inviste en novos modelos de desenvolvemento de medicamentos e produtos sanitarios dende o sector académico público, explora mecanismos anovadores de fabricación e fomenta a colaboración público-privada”. Perte SV reflicte a vontade de manter a atención sanitaria como un servizo público, aínda que se decide por promover a especialización industrial e produtiva na sanidade Merece unha reflexión especial a “colaboración público privada, CPP”: sufrimos máis ben a experiencia, entre nós, de ver a chamada CPP como un astuto procedemento de subordinación do sector público ao sector privado, mediante o que as empresas privadas adoitan apropiarse do patrimonio público e colectivo coa conivencia dos funcionarios responsables. Isto acontece porque temos unha ética do sector público moi fráxil, porque os responsables públicos son facilmente seducidos polas empresas. Aquí necesitamos sólidos principios para establecermos as tipoloxías de influencias indebidas, de responsabilidade dos funcionarios e de equidade nas colaboracións e subvencións. Se damos construído os termos xustos de asignación de responsabilidades, rendición de contas e vixilancia estrita sobre presións indebidas, poderemos ollar con confianza as CPP, tan necesarias para o desenvolvemento industrial e para o Estado Emprendedor. No sector da saúde, de gran potencial de futuro empresarial e de negocios, estase a librar unha formidable batalla dende o sector privado –mellor: dende a rede global de empresas- por facerse con ese negocio, o que inclúe transferir a actividade sanitaria dende a titularidade pública cara á privatización. O Perte SV reflexa a vontade de manter a atención sanitaria como un servizo público aínda que se decide por promover, a través da CPP, esencialmente a especialización industrial e produtiva na sanidade. Isto require unha alianza de actores (CPP – I+D+I), unha proposta de gobernanza e unha sociedade mercantil que coide esas interfaces. Os actores son a administración pública, os hospitais, as empresas e os centros de investigación. Propónselles crear una Asociación Estratéxica en Saúde e apenas se fai unha apelación velada á presencia da comunidade e asociacións de usuarios. Para facer efectiva a CPP créase unha sociedade mercantil con forte participación pública, a Alianza Saúde de Vangarda, cun grupo de traballo interministerial e representantes do sector privado. Entre os actores cita expresamente as patronais Farmaindustria, Asebio e Fenin. A vicepresidencia resérvase para un profesional de recoñecido prestixio. Deséxolle moitos éxitos ao proxecto Perte Saúde de Vangarda.