Os pisos turísticos aumentaron desde 2002 un 23% no Estado e máis dun 40% na Galiza
O número de vivendas de uso turístico (VUT) na Galiza aumenta ano tras ano desde que os rexistros levan a contabilidade deste tipo de inmóbeis. O Instituto Nacional de Estatística (INE) apunta que o incremento de VUT na Galiza nestes dous últimos anos apenas tivo parangón. Se a media estatal no aumento de pisos turísticos de 2022 a 2024 foi de 23%, na Galiza situouse por riba de 40%.
A conselleira de Vivenda, María Martínez Allegue, e o director de Turismo da Galiza, Xosé Merelles, participaron esta sexta feiraen Madrid, canda os seus homólogos doutros territorios, na Conferencia Sectorial de Vivenda sobre o impacto dos pisos turísticos. Unha cita á que a Galiza chega situada no podio das comunidades autónomas ao ter nos últimos anos un dos maiores aumentos no número destes negocios.
O INE indica que entre febreiro de 2022 e febreiro de 2024 —último mes con rexistros de todos os territorios— no conxunto do Estado o aumento no número de VUT foi de 23%, pasando de 285.000 pisos turísticos a superar os 350.000 (351.389) . Nese mesmo período, o incremento na Galiza foi de 41%, 18 puntos superior.
En apenas dous anos o número de vivendas de uso turístico en territorio galego aumentou até superar as 26.000, segundo o último rexistro da Xunta da Galiza. Ese 41% de incremento supera a suba rexistrada nese mesmo período en territorios tan turísticos como Andalucía (+35%), Illes Balears (+6%), Catalunya (+28,6%), País Valencià (+25%) ou a Comunidade de Madrid (+27,6%).
Só Asturias e Cantabria, con incrementos de 53% e 44% en número de pisos turísticos nestes dous anos, presentan unha suba maior que a da Galiza.
42 novas VUT ao día
As cifras do rexistro da Xunta indican que só entre decembro de 2023 e marzo de 2024 rexistráronse 5.089 novos pisos turísticos. Unha media de 42 novas vivendas para uso turístico cada día, un incremento nese trimestre de 23%. De feito, a Galiza é, tras as comunidades mediterráneas e Madrid, a autonomía con maior número destes inmóbeis.
Constante
En outubro de 2019 había na Galiza 5.400 vivendas de uso turístico (VUT). Facíase daquela un ano da entrada en vigor do decreto que regulaba este tipo de vivendas no país e existía xa un debate sobre o impacto deste tipo de inmóbeis e sobre a necesidade dunha maior regulación.
Tres anos e medio despois, 2022, os pisos turísticos rexistrados superaban os 17.900 mentres que aqueles que se destinaban ao aluguer convencional eran 3.000, segundo as cifras da Federación Galega de Empresas Inmobiliarias (Fegein). Por cada piso para aluguer, seis vivendas de uso turístico. E a porcentaxe continuou a agravarse, pois a oferta para aluguer convencional ou residencial mantense e o número de VUT aumentou en varios miles.
Suba de aluguer
Ao tempo, o prezo da vivenda na Galiza continúa a moverse en parámetros de máximos. Mentres ao longo do ano 2023 a media do que se pagou por un piso ou casa nos Estados da Unión Europea aumentou en 0,2%, na Galiza ese incremento foi de 3,4%, unha porcentaxe sensibelmente superior.