Políticas LGBTQ: o PP, sen folla de ruta

En xuño o movemento LGBTQ visibiliza a súa loita política, o 28 conmemórase a nivel internacional o Día de loita pola diversidade e a reivindicación dun mundo no que todas as formas de existir e relacionarnos sexan igual de válidas. Un ano máis na Galiza colectivos de todo o do país preparan actividades para dar voz ás marxes do sistema cisheteropatriarcal. E e constatamos, tamén, a inexistencia dunha axenda pública de políticas LGBTQ na Galiza. A lexislación autonómica en materia LGBTQ é escasa. A aprobación en 2014 da Lei galega pola igualdade de trato e a non discriminación das persoas LGBTQ non supuxo un avance na materia nen nas políticas reais pois o PP non despregou as medidas nen o financiamento necesarios para desenvolver a lei, criticada xa no seu momento polos colectivos sociais por insuficiente. En 2016 a Xunta de Galiza aproba o decreto mediante o cal os Centros de Información Municipal ás Mulleres (CIM) pasan a ter tamén competencias sobre materia LBGTQ, ampliando este servizo mais sen dotalo de financiamento e recursos especializados, deixando a atención das persoas do colectivo en mans de profesionais que poden estar ou non formadas para desenvolvelas. Este decreto e o que se comenta a continuación son as únicas liñas de actuación en materia LGBTQ do goberno do PP na Xunta. En 2018 a Xunta crea e regula mediante o Decreto 131/2018, de 10 de outubro, o Observatorio galego contra a discriminación por razón de orientación sexual e identidade de xénero que hoxe en día conta cun enderezo electrónico de contacto mais ao que non se lle coñece vida e actividade pública. A propia web da Xunta carece de información sobre o organismo. As situacións de acoso, agresión e ataques físicos son unha realidade constante no mercado laboral das persoas LGBTQ Así as cousas, os datos cos que se conta para analizar a situación do colectivo e para pór en marcha políticas públicas que aborden as diferentes problemáticas son escasos: as denuncias de delitos de odio que orientan sobre o avance ou o retroceso das violencias, o Observatorio Coruñés contra a LGBTFobia do colectivo ALAS e os informes de diferentes colectivos que permiten achegarse puntualmente á problemática en material laboral ou económica de parte do colectivo. Discriminación Parte da información pode atoparse na actualidade a través dos datos que aportan as chamadas ao teléfono 028 posto en marcha polo Ministerio de Igualdade do Goberno español para a información e atención integral en materia de dereitos do colectivo, mais a súa función está máis enfocada aos delitos de odio e casos de discriminación. Conta con profesionais con formación especializada para a asistencia psicolóxica e xurídica. Estes días coñeciamos que este servizo recibiu máis de 6.700 chamadas de todo o Estado en 2023, mais as realizadas dende a Galiza representan apenas un 1,5%, limitando enormemente os datos que se poden obter por esta vía. Outra das fontes de información son as denuncias por delitos de odio. Na Galiza dende 2013 rexistráronse máis de 400 denuncias das que unhas 130 corresponden con agresións relacionadas coa orientación sexual das agredidas. Nos últimos anos víronse incrementados os efectos dos discursos de odio por causa da normalización que a LGTBQfbia ten acadado a nivel social da man das formacións de ultradereita coa complicidade e o silencio dun PP que introduce nos seus programas de goberno cuestións do colectivo por presión social pero que non implementa políticas públicas nesa materia nas institucións en que goberna. En materia laboral contamos cun informe realizado pola Xunta titulado A diversidade no entorno laboral: situación laboral das personas LGTBI na Galiza, un estudo realizado a través de entrevistas e relatos de 189 persoas, a maior parte do colectivo, que non ofrece datos do conxunto da poboación. A maioría das persoas participantes sinalaron ter omitido datos no seu CV, ocultado a súa orientación sexual/identidade de xénero na entrevista de traballo e mudado a súa forma de comportarse e/ou vestir na entrevista para conseguir o emprego. Máis de 80% denunciaron ter vivido unha situación de acoso, agresión e até ataques físicos pola súa orientación sexual ou a súa identidade de xénero. Unha realidade constante no mercado laboral das persoas LGBTQ. Na actualidade non existen propostas políticas por parte do Goberno da Xunta para abordar as preocupacións e discriminacións que sufre o colectivo LGBTQ, e ao igual que no caso das políticas de igualdade, non existe a vontade política para pór en marcha medidas e recursos que contribúan a mellorar a vida dun colectivo que enfronta niveis de violencia cada día maiores nunha sociedade na que os discursos de odio precisan dun forte combate na rúa mais tamén nas institucións, que deberan pór todos os recursos ao seu alcance para esta tarefa.