Profesionais do Sergas e pacientes téñeno claro: "A sanidade nunca estivo peor"

Un día despois de que o presidente da Xunta da Galiza, Alfonso Rueda, presentara o denominado Plan de cobertura de necesidades de persoal médico en Atención Primaria para o período estival, o conselleiro de Sanidade, Antonio Gómez Caamaño, afirmou esta terza feira que agarda cubrir as baixas de profesionais xeradas polas vacacións incorporando médicos internos residentes (MIR) de cuarto ano -que só poden desenvolver a súa actividade coa supervisión dun facultativo-. A proposta non convence ao BNG, que a cualifica de "ocorrencia" e “despropósito”, nin ao PSdeG, que acusa o titular de Sanidade de “botar balóns fóra”. Na mesma liña, profesionais, usuarias e usuarios da sanidade alertan dunha “preocupante" situación”. "A sanidade nunca estivo peor". Quen así fala é Adolfo Corral, presidente da Xunta de Persoal do Hospital da Mariña en Burela, quen lamenta, en declaracións a Nós Diario, que “se está normalizando que che dean cita para Atención Primaria 20 ou 30 días despois de tela solicitada, cando non hai tantos anos que cha daban no mesmo día”. Nesta liña, advirte dun “colapso” da asistencia sanitaria na comarca da Mariña nos meses de verán, que “afecta a Atención Primaria pero tamén ao hospital”. A problemática da Mariña Corral sinala que “no Hospital da Mariña están fechadas 38 camas durante os meses de verán, o que obriga a internar adultos na unidade de Pediatría e trasladar pacientes a Lugo para ser atendidos”. Ao tempo, denuncia que “a situación en Atención Primaria é límite. No Punto de Atención Continuada (PAC) de Viveiro, que presta asistencia aos concellos mariñáns de Viveiro, Ourol, O Vicedo e Xove, só están cubertas dúas prazas de Medicina de sete”. Na mesma liña, apunta que unha situación semellante dáse noutras localidades da Mariña “como Ribadeo ou Cervo". O tempo de espera media para unha cita en Atención Primaria nos municipios da Mariña rolda os 20 ou 25 días; porén, o período de agarda é maior na tempada estival, ao non cubrir a Xunta da Galiza as baixas de profesionais derivadas das vacacións e ao incrementarse de forma exponencial a poboación pola afluencia de turistas á comarca. Así, por exemplo, o concello de Viveiro nos meses de verán alcanza os 25.000 residentes, 10.000 mais que no resto do ano; Foz supera os 30.000, ao redor de 20.000 mais que os censados, e Ribadeo suma 20.000, o dobre que durante o inverno. Veciñanza de varios concellos mobilízase contra os recortes da Xunta en sanidade O caso do Barbanza “A nosa é unha zona de veraneo”, explica a Nós Diario, Marián Rodríguez, voceira da Plataforma en Defensa da Sanidade Pública do Barbanza. Indica que “moita xente da que vén aquí ten unha segunda residencia e pasa todo o verán e non só uns días. Aquí vén xente maior que está con sintrom e que ten que seguir cos controis e hai xente con doenzas crónicas que precisa estar atendida durante este tempo”. Tanto é así, que o concello de Ribeira incrementa a súa poboación en perto de 20.000 persoas e o concello de Rianxo aumenta os seus habitantes nunha cifra próxima a 6.000 persoas. A falta de persoal é unha constante na rede de Atención Primaria da comarca do Barbanza. Así, no punto de atención continuada (PAC) de Ribeira permanecen vacantes cinco das dez prazas de Medicina das que dispón o ambulatorio en quenda de mañá, ao negarse a cubrir o Goberno galego as baixas con novos profesionais. Pola súa banda, no centro de saúde de Rianxo, a Xunta da Galiza mantén catros vacantes de Medicina no centro de saúde, que representa a metade do cadro de persoal do consultorio. Ao tempo, en Boiro tres das 12 prazas de Medicina permanecen sen cubrir de forma estrutural. A situación de Sanxenxo “Este ano vai ser igual de malo que os anteriores. Non hai ningún interese en resolver os problemas da Atención Primaria e da sanidade pública”, asegura a Nós Diario Ana Camiña, voceira de Sos Sanidade Pública en Sanxenxo (O Salnés), quen afirma que “levamos desde 2017 con este problema e seguen sen cubrir as baixas malia as convocatorias de MIR porque non lle ofrecen unhas condicións laborais axeitadas aos profesionais”. Nesta dirección, denuncia que “a alternativa de ofrecer vivenda aos médicos e ás médicas que viñeran traballar a Sanxenxo non funcionou. Non veu ningún”. Sanxenxo conta con dous centros sanitarios de Atención Primaria. Segundo Camiña, “o punto de atención continuada de Baltar ten asignado nove médicos e dous pediatras, pero só están cubertas cinco prazas de Medicina e unha de Pediatría ao longo do ano”. Na mesma liña, destaca que “o centro de saúde Vilalonga só dispón dun médico, malia que hai creadas dúas prazas”. Nesta dirección, indica que “o PAC de Baltar presta asistencia, tamén, á veciñanza de Meaño e durante o verán derivan residentes do Grove”. Sanidade espera captar un cento de MIR de 4º ano, "polo menos 80%", para cubrir vacantes no verán A poboación de Sanxenxo alcanza nos meses de verán as 80.000 persoas. Este incremento das e dos residentes coincide cunha redución do persoal sanitario e ten un impacto no conxunto do sistema de saúde da área sanitaria de Pontevedra. 40% de prazas médicas sen cubrir no Morrazo Cangas (O Morrazo), cunha poboación de perto de 27.000 persoas, na tempada estival alcanza os 80.000 pola chegada de turistas, e neste caso, o turismo ten marcado carácter residencial, como noutras localidades da comarca, por exemplo Bueu. A Xunta da Galiza vén de renunciar a fechar pola tarde durante a tempada estival o PAC, o que implicaría deixar a localidade sen servizos médicos desde as 15 horas. Porén, a voceira d'A Voz da Sanidade, Carmen Nores, denuncia en declaracións a Nós Diario que “40% das prazas de persoal médico no PAC están sen cubrir durante o ano e a situación complícase no verán”. Sinala que “o PAC contaba co servizo de reforzo para o verán, programa que dotaba dunha médica e dunha enfermeira máis o centro, pero hai anos que non se cobre”. Explica que “o PAC de Cangas presta servizo a Moaña tras deixala a Xunta sen servizo de urxencias”. Os sindicatos critican o plan da Xunta para a sanidade O plan activado na Galiza para cubrir as vacantes de persoal médico no verán foi recibido con críticas -sobre todo no que respecta á mobilización dos MIR de cuarto ano-, así como coa percepción de que as medidas sexan "un parche" para o verán, pero non constitúen "unha solución" para unha planificación que "debería efectuarse a máis longo prazo". A primeira medida será fomentar a "mobilidade temporal" dos facultativos a través da figura dos "médicos itinerantes", é dicir, os que exercen nun centro de saúde pero que puntualmente se poderán desprazar a outros máis tensionados, como os de municipios costeiros, incluído persoal doutras comunidades que veranee na Galiza, cun censo onde anotarse voluntariamente. Rueda quere suplir agora a falta de persoal médico en Primaria con profesionais de vacacións en réxime voluntario A CIG, UXT, CCOO e CSIF critican que Sanidade pretenda resolver o problema de falta de profesionais na Primaria con persoal residente, que debe traballar sempre con supervisión.O secretario nacional da CIG-Saúde, Manuel G. Moreira, subliña que as dificultades para cubrir as prazas na Primaria non se limitan á necesidade de substituír ausencias por vacacións, xa que, por culpa das políticas de recortes aplicadas pola Xunta, "partimos de cadros de persoal minguados". Fontes de CSIF, CCOO e UXT ven o resto dos puntos do plan asumíbeis sempre que se expoña desde unha perspectiva "incentivada e voluntaria", aínda que comparten dúbidas acerca da capacidade destas propostas para liquidar uns problemas aos que outorgan un carácter máis "estrutural". Aliás, fontes da Asociación Galega de Medicina Familiar e Comunitaria critica que a Xunta deixe na "voluntariedade" do persoal o problema da falta de médicas.