As protestas contra Altri animan o San Caralampio de Melide máis combativo
Non hai remate do verán en Melide sen o día de San Caralampio. Este ano a festividade estivo marcada polas propostas contra Altri.
O segundo domingo de setembro Melide, na comarca homónima, celebra a festividade San Caralampio, unha xornada onde o viño é o protagonista e o casco histórico da localidade fica pequeno diante da chea de xente.
San Caralampio é unha referencia para todas as persoas de Melide e da súa contorna, pero sobre todo para as xentes da localidade que residen fóra da Galiza, moi particularmente en Euskadi, destino tradicional da emigración da zona.
A festividade de San Caralampio significa para todos os melidenses da Galiza e da diáspora o remate do verán, por iso é unha festa rachada de confraternidade e de irmandade.
As protestas contra a celulosa que a multinacional Altri pretende erguer o no municipio limítrofe de Palas de Rei, na comarca da Ulloa, marcaron a edición deste ano de San Caralampio.
Melide Vivo, a estrutura local da plataforma Ulloa Viva, convocou na xornada de hoxe unha acción lúdica e reivindicativa para evidenciar o rexeitamento da veciñanza da zona ao proxecto da pasteira.
Festa rachada contra Altri
O colectivo promoveu unha sesión de photocall na praza melidense das Coles, onde centos de persoas posaron tras un deseño realizado para a ocasión polo artista local Quiñoi.
O espazo escollido por Melide Vivo estivo durante toda a mañá animado por ducias de persoas que cantaron diversas pezas contra a celulosa, entre elas unha escrita polo cantante Xurxo Souto.
Souto acompañou aos membros dos colectivo na posta en escena da súa cantiga Altri non. A letra da composición sinala nunha da súas partes “vaite lavar porcona/ vaite lavar/ Altri nin na Galiza/ nin en Portugal”.