Un rescatador de Gardacostas denuncia a Xunta e Avincis por "delito contra a seguridade" e "prevaricación"
Un rescatador da base de Gardacostas de Celeiro, no Concello de Viveiro —comarca da Mariña— vén de interpor nos xulgados de Lugo unha demanda penal contra a Xunta da Galiza e Avincis —antes Babcock International, adxudicataria e encargada de operar e manter os dous helicópteros de Gardacostas—. Na denuncia, á que tivo acceso Nós Diario, este nadador de rescate con máis de 13 anos de servizo, considera que a Xunta e a adxudicataria incorren en posíbeis delitos "tipificados nos artigo 316 e 404 do Código Penal: delito contra a seguridade e saúde no traballo, e prevaricación".
A orixe desta denuncia penal está nunha nova incidencia a bordo dun dos helicópteros de salvamento e rescate do servizo de Gardacostas. O pasado 9 de xuño, segundo consta na denuncia, durante unha misión de adestramento enganchouse ao fuselaxe da aeronave o cable da "única grúa do helicóptero que presta servizo na base de Viveiro", poñendo en serio risco a seguridade do rescatador. O denunciante indica que, segundo o punto 2.8.2 do prego de condicións asinados entre a Xunta e Avincis, nos helicópteros debe de haber unha "grúa de rescate auxiliar".
Mais a aeronave de Gardacostas carece deste elemento obrigatorio "malia os continuos requirimentos efectuados" por parte de persoal e sindicatos para que se doten dese elemento. A ausencia desta grúa auxiliar, afirma o rescatador, pon "en risco a situación dos traballadores", en casos de incidencias como a do pasado día 9.
Omisión do incidente no informe
Ademais, e segundo se recolle na propia denuncia presentada nos Xulgados de Lugo, "omitiuse no informe oficial de servizo do día [en referencia á xornada do 9 de xuño] calquera mención ao incidente", malia que "o informe do operador de grúa do servizo si corrobora o sucedido".
Para o denunciante existe "unha infracción das normas sobre prevención de riscos laborais", ao tempo que se dá unha "non facilitación dos medios necesarios para que os traballadores e traballadoras desenvolvan a súa actividade coas medidas de seguridade adecuadas". Isto deriva, considera o responsábel da denuncia, nun "perigo grave para a vida, a saúde ou a integridade física" do persoal da base da Mariña.
"Delito continuado"
Neste contexto, a Xunta da Galiza —"que ten constancia desde o ano 2020 de que Avincis (antes Badcock) está incumprindo o prego" de condicións— estaría a incorrer para a persoa denunciante nun "delito continuado de prevaricación por omisión", tipificado no Código Penal.