Comparacións odiosas

"Preguntouse por que aqueles que querían destruír todo o bo do seu país, eran precisamente os que máis présa se daban, en enarborar a bandeira nacional". Ken Follett (Cardiff, Gales, 1949), escritor británico de novela histórica e de suspense. Cando falamos de comparacións, non convén comparar persoas ou cousas entre si para evitar que algunha se sinta menosprezada, porque cada unha ten os seus propios valores. Pero é moi significativo que cando valoramos as políticas de goberno, sexa a nivel estatal ou autonómico, teñamos que poñer en cuestión en que se gastan os diñeiros públicos? Poucas veces se pide opinión á cidadanía sobre que facer con algunhas partidas, que os gobernos invisten sen dor ningunha (sempre hai cartos para "iso") e con outras, que a poboación considera de primeira orde (como a sanidade), os mesmos gobernantes son tan mesquiños que mesmo menosprezan o ben máis prezado que temos: a nosa saúde. O día 19 de maio do 2023 sóubose que "o Estado español aumentará un 73% o gasto militar ate 2026, para sumar 75.798 millóns de euros". Seguro que este investimento é "supernecesario", pero logo valoramos o orzamento en cousas do día a día, como ter pediatra no concello (temos 201 municipios na Galiza sen servizo de pediatría), ter un servizo de urxencias a unha distancia lóxica, ter acceso a especialistas en psicoloxía clínica sen unha lista de agarda interminable, ter un servizo de matrona, persoal médico de cabeceira próximo e sen esperas infinitas, poder asistir a unha consulta e non ter que explicar por teléfono o que che ocorre... Pois ben, neste contexto, sabemos que a Xunta da Galiza, paga á sanidade privada 611.000 euros.. diarios! Este ano 2023, dará 223 millóns de euros. E na última década, 2.000 millóns de euros. A externalización de diferentes servizos, como o das ambulancias "do Sergas", cústanos 13,9% do orzamento. Son datos oficiais do IDIS: Instituto para o Desenvolvemento e Integración da Sanidade (entidade privada que aglutina este sector). Débeda pública En 14 anos, os Gobernos do PP aumentaron a débeda pública da Galiza en 8.023 millóns Un concepto importante é a débeda pública, que nos indica se unha administración é ou non "boa xestora dos cartos públicos". Na Galiza, no ano 2008 era de 3.954 millóns de euros. Se a comparamos coa de 2022, que era de 11.977 millóns de euros, deducimos que os Gobernos do PP na Galiza, nestes 14 anos, aumentaron a débeda pública en 8.023 millóns de euros, o que supón un aumento da carga a cada galego: de 1.429 euros a 4.213. A comparación, como se ve, deixa en moi mal lugar os Gobernos de Alberto Núñez Feijóo e Alfonso Rueda como "bos xestores". Por que Galiza convoca menos prazas MIR que as permitidas polo Estado? Podemos compararnos con outras CCAA, que si captan a totalidade das prazas que lles concede o Ministerio... pero Galiza non. Rueda saberá os motivos, pero non é lóxico queixarse día si e día tamén dicindo que a culpa é de Madrid, cando el é un irresponsable que deixa sen cubrir prazas moi necesarias na Galiza. Pero aínda é peor: Rueda, na Galiza, convoca as prazas de persoal médico (sen oposición e só por concurso), e das que convoca, moitas delas quedan desertas. Como administrador do ben máis importante que temos, un desastre. E podemos seguir comparando (e saíndo mal parados): a metade das persoas pensionistas da Galiza vive baixo o limiar da pobreza. Situámonos á cabeza do Estado con máis xubiladas en risco de penuria económica (informe da Rede Europea de Loita contra a Pobreza). 'Sentidiño' e rigor Máis comparacións odiosas: dous de cada tres sanitarios afirman estar "queimados". Sabiamos de estudos que falaban de un de cada tres, pero despois da pandemia xa son dous de cada tres. (Estudo publicado na revista International Journal of Social Psychiatry). E temos unha última comparación (por falta de espazo) que é escandalosa: Galiza e Madrid, sitúanse a cola do Estado en investimento en Atención Primaria. Segundo datos do Ministerio de Sanidade o gasto na Galiza é 2,4% por debaixo da media do Estado. Estamos de penúltimos, só por riba de Madrid (ambos os dous territorios gobernados polo PP). Con esta perspectiva é moi difícil atraer profesionais a este territorio e peor aínda, dar un servizo de calidade á poboación. Debería caerlles a cara de vergoña ao permitir esta situación a quen presume de usar o "sentido común –sentidiño–". Podemos concluír que é o único sentido que non utilizan con rigor.