Sanidade nega "reaccións graves" nas persoas vacinadas co lote investigado de AstraZeneca

A Galiza recibiu vacinas procedentes do lote de AstraZeneca que está a ser investigado e que levou a países da Unión Europea como Austria ou Dinamarca a suspenderen temporalmente a súa inoculación.

Confirmouno esta sexta feira o conselleiro de Sanidade, Julio García Comesaña, na rolda de prensa posterior á xuntanza que mantivo o subcomité clínico para avaliar a situación epidemiolóxica de cada concello.

Porén, a Consellaría remitiu este serán un comunicado asegurando que, após contactar coas persoas que recibiran a vacina, non se rexistrou "ningunha reacción grave".

"O lote chegou á Galiza o pasado día 12 de febreiro e administrouse seguindo o Plan Galego de Vacinación que incorpora dous sistemas de seguimento: a trazabilidade que identifica o lote da vacina e a persoa á que se lle administra e o programa de farmacovixilancia estabelecido para este tipo de vacinas, a través do cal se comunican, rexistran e estudan as posibles reaccións adversas, das que se fai seguimento", sostivo o departamento de Sanidade.

O conselleiro xa dixera a primeira hora da mañá que seguirá as recomendacións das autoridades competentes: "Nin a Axencia Española do Medicamento nin a Europea recomendaron inmobilizar o lote ou suspender a vacinación. Non faremos nada diferente do que digan, e, se mudan de criterio, adaptarémonos".

Cómpre lembrar que a Axencia Europea do Medicamento avaliou esta quinta feira a seguridade da vacina de AstraZeneca: "Os beneficios seguen a superar os riscos, e non hai indicios de que os trombos e coágulos sanguíneos sexan un efecto secundario", sostivo o organismo, nun comunicado.

A Xunta, de momento, seguirá a administrar estes viais ás persoas de entre 50 e 55 anos. De feito, na quinta feira celebrouse na Cidade da Cultura de Compostela unha "proba piloto" de vacinación a un milleiro de persoas.