Segue na UCI a vítima do crime de Samos, de 73 anos

A muller de 73 anos que a pasada sexta feira foi acoitelada por un veciño de Samos (comarca de Sarria) continúa ingresada na unidade de coidados intensivos do Hospital de Lugo, segundo confirman esta cuarta feira fontes sanitarias citadas pola axencia Europa Press. A principios desta semana o persoal médico informaba de que estaba "fóra de perigo" malia a gravidade.

O presunto autor dos feitos, de 49 anos, ingresou o domingo en prisión provisional, comunicada e sen fianza investigado por un delito de asasinato a un home, de 82 —o marido da hospitalizada—, e por tentativa de homicidio a esta muller, que segue na UCI.

A vítima presentaba lesións graves por arma branca no pescozo e no tórax. Após teren coñecemento dos feitos, pasadas as 8 horas da mañá, até o lugar desprazouse o helicóptero do 061 con base en Ourense e mais o médico e a ambulancia da zona.

Segundo o 112, un particular alertou de que unha persoa fora apuñalada na parroquia de San Mamede do Couto, no lugar de Lamas, onde se mobilizaron os servizos sanitarios e efectivos da Garda Civil que procederon á detención do presunto autor dos feitos.