O uso do autobús urbano medra 22% na Galiza
O número de usuarios de transporte urbano en autobús situouse nos 5,1 millóns de persoas o pasado mes de xuño no conxunto da Galiza, o que supón 22,2% máis que no mesmo mes de 2022, segundo os últimos datos publicados esta quinta feira polo INE.
O incremento de viaxeiros e viaxeiras en autobús urbano no país é, con todo, inferior á media estatal, que anotou neste período unha repunta de 23%, até os 160,9 millóns de persoas usuarias.
No que vai de ano, Galiza aumentou o número de cidadáns e cidadás transportadas en autobús por volta de 20%, mentres que a tendencia estatal foi de 22,5%.
Datos estatais
No conxunto do Estado español, pola súa parte, o número de pasaxeiros na Alta Velocidade disparouse 34,3% o pasado mes de xuño, até os 2,9 millóns, con base na mesma estatística, que destaca tamén un incremento de 57,3% nos ferrocarrís de media distancia, con máis de 4 millóns de viaxeiros.
Máis de 450,7 millóns de pasaxeiros utilizaron o transporte público no Estado o pasado mes de xuño, 18,3% máis que no mesmo mes do ano 2022. O transporte urbano aumentou 21,7% en taxa anual e o interurbano fíxoo por volta de 18,5%. Dentro do interurbano, destaca especialmente o incremento de 22,3% no transporte por ferrocarril.
A taxa de variación do número de pasaxeiros do transporte público a nivel estatal do mes de xuño respecto aos datos de maio foi de -3,7%, segundo os datos do instituto estatístico.