Veciñanza de Val do Dubra protesta contra un vertedoiro

Veciñanza da parroquia de Niveiro, en Val do Dubra (comarca de Compostela), concentrouse esta quinta feira diante do Concello para expresar de novo o seu rexeitamento á construción dun vertedoiro a ceo aberto na canteira de Pedra Facha. Convocados pola plataforma Niveiro Veciños, e apoiados por asociacións ecoloxistas como Adega e o Goberno local de Val do Dubra (PSdeG e Anova), veciñas e veciños da zona e mesmo de concellos limítrofes como Trazo, rexeitaron de novo a instalación desta entulleira e instaron a Xunta da Galiza a que “non emita informe medioambiental favorábel á instalación” do vertedoiro.

Esta nova mobilización veciñal en Val do Dubra responde á sentenza que obriga o Concello a "dar compatibilidade urbanística ao proxecto". En abril, o Goberno local e a plataforma mantiveron un encontro logo de recibir o Concello un oficio xudicial que impón o cumprimento obrigatorio da sentenza do Xulgado do Contencioso-Administrativo da Coruña.

O apoio xudicial á instalación non freou a veciñanza, que acordou intensificar as mobilizacións en contra este vertedoiro e explorar vías coas que seguir a loitar para frear a súa implantación. O Concello estuda alternativas para impedir o que consideran "un gran problema", non só para Val do Dubra senón tamén para os concellos limítrofes.

Compatibilidade urbanística "negativa"

A antiga canteira de Pedra Facha, funcionou anteriormente para actividades mineiras. Agora, un proxecto de rehabilitación e rexeneración da zona promovido pola empresa Gongojova (arrendataria dos terreos de Francisco Gómez e Día), inclúe a instalación dun vertedoiro de residuos "non perigosos", segundo a empresa promotora.

Con todo, o Goberno local emitiu inicialmente un informe de compatibilidade urbanística negativo "por considerar que se ben a rexeneración da canteira resultaría urbanisticamente compatíbel, non o sería que esta inclúa a creación do pretendido vertedoiro de residuos".

Veciñanza e Concello fican agora pendentes dos trámites medioambientais ante a Xunta, insisten en que este proxecto vai contra os intereses xerais municipais "que se entenden gravemente lesionados por este proxecto de vertedoiro, de indiscutíbel e considerábel impacto medioambiental e socioeconómico, tanto presente como futuro".