Chega a porto en Irlanda a tripulación rescatada do 'Nuevo San Juan', que declarará ante as autoridades
This browser does not support the video element.
Os 15 tripulantes do pesqueiro de Burela (A Mariña) Nuevo San Juan, rescatados o pasado domingo polo tamén galego Nuevo Confurco após sufrir un incendio en augas do Gran Sol, xa están no porto irlandés de Castletownbere, onde arribaron contra as 8.30 horas desta segunda feira. En declaracións á axencia Europa Press, o xerente da Organización de Produtores Pesqueiros do Porto de Burela, Sergio López, afirmou que están "todos ben" e "tranquilos".
Agora poranse a disposición das autoridades para contar o sucedido e o patrón realizará a coñecida como protesta de mar, a manifestación formal do ocorrido en caso de sinistro. A tripulación está conformada por 15 persoas de diferentes nacionalidades, entre os que se atopan galegos, indonesios e suramericanos.
Preguntado polas causas do incendio no buque, López apunta que "cando hai un incendio parece ser que o lóxico sexa por un tema eléctrico", pero deixa claro que "só hai suposicións", polo que pide esperar á investigación para coñecer as causas, aínda descoñecidas.
O incidente
A tripulación do pesqueiro de Burela Nuevo San Juan foi rescatada na mañá deste domingo polo buque Nuevo Confurco tras producirse un incendio mentres faenaba no Gran Sol. No pesqueiro había 15 tripulantes, que foron rescatados en perfecto estado, polo que só houbo que lamentar perdas materiais.
Salvamento Marítimo confirmou que recibiu un aviso do Nuevo San Juan pouco despois das 7 horas no seu centro de Fisterra polo incendio a bordo en zona SAR británica. Con esta información, Salvamento informou o seu homólogo no Reino Unido, que desviou varios buques á zona. Contra as 7.45 efectuouse o rescate polo Nuevo Confurco, que evacuou todas as persoas en bo estado a bordo de dúas balsas salvavidas.
O Nuevo San Juan é un palangreiro de fondo que está activo desde maio de 1999 e pertence ao censo unificado da frota de NEAFC. Realiza a súa actividade en augas internacionais, Británicas e Europeas, do sur e oeste de Irlanda (Gran Sol) e de Francia (golfo Biscaia), dedicado especialmente ás capturas de pescada do pincho. Os seus datos técnicos no censo da frota pesqueira son de 31,5 metros de eslora, 320 GTs e 848 CV de potencia.
O Concello de Burela lamentou este suceso nun comunicado en redes sociais e aproveitou para enviar "moito ánimo e forza" ao patrón e a toda a tripulación.