A voltas coa bandeira

Milleiros de persoas mobilizáronse na segunda feira en cidades e vilas galegas para denunciaren o xenocidio do pobo palestino a mans do Estado terrorista de Israel. Milleiros de galegos e galegas que querían amosar a súa solidariedade cun pobo que leva décadas sufrindo todo tipo de atrocidades. Galegos e galegas que portaban bandeiras palestinas e bandeiras da patria coa estrela vermella, mentres berraban "Galiza, Palestina solidariedade". Supónselle a cada unha das persoas asistentes sensibilidade cos dereitos políticos, democráticos e territoriais que Palestina ten. Supónselle a cada unha das asistentes sensibilidade co dereito á autodeterminación que unha comunidade humana que vive nun territorio, cunha cultura diferenciada e unha lingua de seu ten. Supónselle, pois, a cada unha das persoas asistentes sensibilidade coa defensa dos dereitos dos pobos a ser e a existir. Por iso é tanto máis complicado comprender algunha voz que na mobilización celebrada en Compostela berrou contra o tan coreado lema "Galiza, Palestina solidariedade" e contra as bandeiras da patria. Contra a nosa bandeira. Estrela vermella Houbo un tempo no que nas xuntanzas de diversas plataformas saían voces pedindo que non se levasen bandeiras nin da patria, nin das organizacións que as conformaban nas mobilizacións que se convocasen. Voces que, amparándose nun suposto apartidismo ou apoliticismo, pedían que non se portasen bandeiras para identificarse. Porén, pode haber algo máis político que unha mobilización? Tanto como político é declararse solidarias con Palestina e acusar Israel de Estado xenocida. Tanto como declararse galego ou galega e desde aquí, desde Galiza, un territorio diferenciado que, na súa lingua e desde a súa cultura, amosa a súa solidariedade co pobo palestino portando a súa propia bandeira. Unha bandeira que, coa súa estrela vermella, representa a solidariedade con todos e cada un dos pobos oprimidos do mundo. Unha bandeira que, coa súa estrela vermella, enarbora, sen complexos, o seu internacionalismo. Unha bandeira que, coa súa estrela vermella, se alía coas clases populares fronte aos abusos dos poderosos. Eses que non precisan bandeira ningunha nin para abusar, nin para esmagar pobos ou persoas. Unha bandeira, a nosa, que historicamente acompañou protestas contra a invasión de Iraq, que ondeou en mobilizacións a favor do dereito de autodeterminación do Sahara, que estivo en todas aquelas marchas de denuncia das intervencións, directas ou inducidas, dos Estados Unidos contra países de América Latina, ou África, ou o Medio Oriente, contra o bloqueo a Cuba, contra a OTAN ou contra as inhumanas medidas impostas pola troika. Así que só cabe unha resposta ante tan desaforado rexeitamento a proclamar que, desde Galiza, declaramos a nosa solidariedade con Palestina ou a que, canda unha bandeira palestina, ondee a nosa bandeira galega coa estrela. E non, non é pola estrela -que para algunha 'esquerda' tamén- senón porque se nega Galiza como suxeito. Argüía quen tal berraba contra as bandeiras galegas que esa mobilización non era o sitio, que só podía haber bandeiras palestinas. Como se a presenza da bandeira galega restase potencia á mobilización. Houbo quen mesmo argüíu que sen as bandeiras galegas se ampliaba o abano de persoas que puidesen sumarse a estas protestas. As bandeiras teñen valor simbólico, unhas porque representan a defensa da liberdade e os dereitos democráticos; outras, a súa negación Simboloxía Hai quen defende que unha bandeira é só un trapo e que repite aquilo de abaixo as fronteiras. E iso deféndeo empregando unha lingua e desde un territorio. Hai quen se di de esquerdas e defende fervorosamente dereitos de pobos como o saharauí ou o palestino, amparándose nun hipotético internacionalismo. Porén, non lle doen prendas cando se alía con quen promove un proceso de uniformización lingüística, cultural, política e territorial no Estado español. É ben certo que as bandeiras teñen un poderoso valor simbólico. Unhas porque representan a solidariedade, a defensa da liberdade, os dereitos democráticos. Outras porque representan a negación dos outros, porque son empregadas como arma arreboladiza para, precisamente, esmagar os dereitos democráticos daqueles. Por iso, quen nega a nosa bandeira hase facer mirar o problema e resolver as súas contradicións. Porque resulta ben complicado pretender unha defensa dos dereitos políticos e democráticos dun pobo a existir, mentres se negan os dereitos políticos e democráticos doutro.