Votarías alguén que...

"As eleccións, ás veces, son a vinganza do cidadán. A papeleta é un puñal de papel". David Lloyd George, político liberal británico, 1863-1945. O sistema democrático do Estado español permite elixir entre múltiples partidos políticos que abranguen dende a extrema dereita ata a extrema esquerda, pasando por partidos centralistas, rexionalistas, independentistas, nacionalistas, ecoloxistas, animalistas, etc. Para elixir un deles, as súas ideas deben ser o máis aproximadas ao que pensamos cada un e cada unha de nós. Moitas veces, decídese votar "o menos malo". Pero de decantarnos por uns ou por outros, depende a nosa vida diaria (e o máis próximo e importante que temos: a nosa saúde). A pregunta que me formulo é se ti votarías alguén que trata de desmantelar o sistema sanitario público galego, facendo da privatización a estratexia fundamental? Depositar na urna un voto para uns ou para outras, incide neste tema e en moitos outros. Accións e decisións Votarías alguén que beneficia sistematicamente os "ricos" e trata de prexudicar, por sistema, os menos afortunados? "O agasallo fiscal de Ayuso aos madrileños máis ricos xa supera os 1.200 millóns. As estatísticas do imposto de patrimonio do ano 2021 aseguran que case 19.000 millonarios esquivaron a tributación e o pago, de media, de 65.000 euros na Comunidade de Madrid", lemos en eldiario.es. Na Galiza, o PP investiu na sanidade privada 20.000 millóns de euros nos 14 anos que leva gobernando. O que se podería facer na sanidade pública con eses cartos! Poderíase reintegrar ao sistema os servizos privatizados: información, historia clínica, receita electrónica, ambulancias, central de chamadas, loxística, investigación, docencia. Restituír o Hospital Álvaro Cunqueiro para a pública, acabar co concerto singular de Povisa e adquirilo para o sistema público. Sen comentarios! Outros exitazos dos Gobernos que "eliximos" na Galiza: as pensións, son as máis baixas do Estado español. As autoestradas, xa amortizadas, son as máis caras. O que se gasta por persoa en sanidade, é a segunda "pola cola", despois de Madrid. E os cartos do céntimo sanitario na gasolina: onde van? Ademais, investiu 2.500 millóns na educación privada. Sigo preguntando, por que dende que está o PSOE no Goberno, xunto con Podemos, non se retirou o copago farmacéutico? Ata 2012 as persoas pensionistas non pagaban os medicamentos. Rajoy (PP), dispuxo: "O Real Decreto Lei 16/2012 establece a porcentaxe de cotización así como un límite mensual de pago, en función dos ingresos da persoa. O pago do usuario será proporcional ao nivel de ingresos. O INSS asigna a achega farmacéutica individual e comunícalla aos Servizos de Saúde das CCAA"... Seguimos esperando! Nesta lexislatura aprobáronse leis moi importantes: PERTE, SMI, suba das pensións... e sistematicamente, partidos de dereita e de extrema dereita votaron en contra destas melloras. Moitas persoas víronse beneficiadas e coa pandemia e a crise de prezos estarían perigosamente abocadas a salarios moi baixos e incluso a despidos. Votarías un partido que está en contra desas leis? Cada persoa do Estado español visitou o médico unha media de 4,8 veces en 2021, fronte a 7,2 da media de Estados europeos Visitas ao médico Datos de Eurostat: cada persoa do Estado español visitou o médico unha media de 4,8 veces en 2021, fronte a 7,2 da media de Estados europeos (33,3% menos). Houbo ademais unha diminución de 35% nas consultas médicas que pasaron de 7,4 por habitante e ano en 2014 ás 4,8 de 2021. O descenso entre 2018 e 2021 foi de 20%, o terceiro máis pronunciado de toda Europa (só Italia e Lituania supérannos). O resultado é que somos o país da UE no que menos persoas acoden ao seu médico ou médica de familia. Ocupamos o último lugar da lista con 20,9% de utilización media pola poboación, fronte a 32,5% europeo e tamén estamos nas últimas posicións en ir á consulta especialista con 9,5% por habitante e ano, fronte a 19,5% da media europea. Evidentemente se es unha persoa que vota partidos que non defenden a clase traballadora, que van en contra da saúde, que privatizan e descapitalizan a educación, non promoven a industria do país... ti tamén es corresponsable do que sucede! Temos unhas eleccións a vista: na nosa man está que gobernen uns partidos ou outros. Valorar o que oferta cada un e non votar "en contra de", é unha boa política para ter un futuro máis esperanzador. A corresponsabilidade ten que empezar por nós mesmas!