Sen educación política non haberá cambio

O 28 de maio de 2023 tiveron lugar eleccións municipais e 56 días despois, 23 de xullo, eleccións xerais. Cómpre analizar a variación dos votos conseguidos nesas dúas citas electorais polas organizacións políticas. Nas eleccións xerais o PP subía 224.315 votos respecto a 2019 (de 475.198 a 699.513) e o BNG aumentaba 31.871 votos (de 120.456 a 152.327). O PSOE descendía 14.329 votos, de 479.355 a 465.026 e Sumar tamén descendía 12.418 votos, de 188.231 de Unidas Podemos a 175.813. Outro dato relevante é a variación entre o voto nas eleccións municipais e as xerais, cun descenso importante do BNG. É verdade que o voto varía moito segundo o tipo de convocatoria electoral e que nas xerais houbo unha polarización do voto entre as dúas principais alternativas, PP-Vox e PSOE-Sumar, co obxectivo de frear un posíbel trunfo da dereita; que Sumar tamén aparecía como un voto útil para derrotar a dereita e que os debates televisivos nos que non participou o BNG puideron incidir decisivamente no voto. A pesar do incremento respecto ás últimas eleccións xerais, o BNG non cumpría coas súas expectativas e todo parece indicar que a súa mensaxe de voto útil por partida dobre, para derrotar a dereita e defender os intereses de Galiza, non foi recollida polo electorado. Política local Analicemos casos significativos de concellos con alcaldías do BNG desde hai anos, nalgúns casos con repetidas maiorías absolutas nas municipais, que son referencias do que se define como "modelo municipal" do BNG. Moeche. Nas eleccións municipais do 28 de maio o BNG tivo 552 votos (64,78%) e 168 votos nas xerais (20,66%). O PP 296 votos (34,74%) nas municipais e 432 (53,12%) nas xerais. Carballo. O BNG que tiña 8.029 votos (53,37%) pasa a terceira forza nas xerais con 2.209 (12,45%). O PP, que tiña 4.308 (28,67%), pasaba a 7.799 (43,97%) como primeira forza nas xerais; e o PSOE, que tiña 1.611 votos (10,72%) conseguía 5.022 votos (28,31%) nas xerais. Allariz. O BNG perdía 702 votos (pasaba de 1.633 a 931 votos nas xerais), mentres PSOE e Sumar subían 544 e 326 votos, respectivamente. Pontevedra. Nas eleccións municipais BNG, PSOE e PP tiveron 13.000, 7.340 e 16.096 votos, respectivamente. Nas xerais o BNG queda como cuarta forza con 4.341 votos, 19.529 PP, 15.640 PSOE e 6.260 votos Sumar (non presentara candidatura nas municipais). Moaña. O BNG baixaba 3.592 votos, de 5.613 nas municipais (56,01%) a 2.021 (16.94%) nas xerais, quedando como terceira forza; PP subía 922 (de 3.192 a 4.114), PSOE subía 2.324 (de 1.057 nas municipais a 3.381); e Sumar, que non se presentaba nas municipais, conseguía 1.846 votos. Tomiño. O BNG perdía 2.924 votos, pasando de 3.904 votos (51,31%) nas municipais a 980 (12,12%) nas xerais e quedando como terceira forza; PSOE aumentaba 1.566 (de 802 a 2.368); e 622 o PP, pasando de 2.723 a 3.345 votos. Algunhas conclusións A valoración da xestión do BNG é moi positiva en concellos onde ten a alcaldía, pero non é un voto consolidado ideolóxica e politicamente, que cambia a partidos estatais e tamén de dereita nas eleccións xerais. En Toques o BNG tivo 544 votos (61,81%) nas municipais e o PP 244 (27,72%); nas xerais o BNG consegue 70 votos (9,09%) e o PP 516 votos (67,01%). En Mazaricos o BNG conseguía 1.319 votos (49,66%) nas municipais e PP 878 (33,05%); nas xerais o BNG tivo 225 votos (9,55%) e o PP 1.143 (61,29%). A perda de votos do BNG nas xerais respecto ás municipais non é unha cousa nova, senón que é unha constante. O BNG subiu en case todos os concellos nestas eleccións xerais respecto a 2019 e considero que mantén intactas as súas posibilidades de presidir a Xunta de Galiza nas eleccións previstas para 9 de xuño de 2024. O incremento do voto debería sustentarse nunha maior implantación social e nun aumento da afiliación. Por poñer unha referencia, en Euskadi, con menor poboación que Galiza, o PNV ten sobre 30.000 afiliadas, unha boa base para explicar os seus resultados electorais e a presenza institucional. A consolidación do voto das municipais require, ademais de boa xestión, maior esforzo para a batalla ideolóxica e a formación política da cidadanía Todo parece indicar que a consolidación dese voto das municipais require, entre outras cousas, ademais de continuar coa boa xestión, dedicar un maior esforzo para a batalla ideolóxica e a educación política ou formación da cidadanía para que moitas persoas votantes do PP comprendan, por exemplo, que é o partido que mellor defende os intereses do capital e dos ricos; por iso é noticia en 2009 a foto da aperta na praza do Obradoiro de Ignacio Sánchez Galán, presidente de Iberdrola, e Feixoo cando este gaña as eleccións en 2009. Galán, por certo, aparece de novo en 2023 con Feixoo na presentación dun libro sobre este candidato á presidencia do Goberno.