O xuízo contra Baltar aprázase máis unha vez

O xuízo previsto para este 31 de maio ao que tiña que enfrontarse o presidente da Deputación de Ourense, Manuel Baltar, suspendeuse pola folga de funcionarios da Administración de Xustiza, segundo confirmaron fontes do Tribunal Superior de Xustiza de Castela e León.

Polo momento, segundo estas mesmas fontes, non se sinalou ningunha outra nova data para un xuízo que se fixou para este día despois de que Baltar non mostrase conformidade coa pena solicitada para el tras ser capturado por un radar a 215 km/h na autovía A-52 o pasado 23 de abril.

O xuízo estaba fixado para primeira hora desta cuarta feira no Xulgado do Penal de Zamora. Tras un primeiro aprazamento por incomparecencia do seu avogado, houbo unha primeira vista en Pobra de Seabra, o 11 de maio, pero non houbo sentenza de conformidade ante o rexeitamento de Baltar a asumir a pena que pedía Fiscalía: a retirada do carné durante un ano; e unha condena de seis meses de multa a razón de 10 euros diarios -1.800 euros-.

Xuízo aprazado, outra vez

Ademais de evitar a 'foto' no xulgado, xa que entón declarou de forma telemática, Baltar sorteou unha condena e a súa defensa avanzou que vía vías para recorrer e evitar o xuízo. Finalmente, non prosperaron, e o xuízo debería manterse, aínda que varias vistas previamente fixadas sufriron aprazamentos no marco da folga de funcionarios da Administración de Xustiza.

Así, aínda que o dirixente ourensán puido evitar unha condena antes da cita coas urnas do pasado domingo 28 de maio, non logrou o obxectivo político de consolidar a maioría absoluta na Deputación de Ourense (a falta dunha, dado que os populares lograron a maioría na institución con 12 deputados).

Isto déixao nunha situación de maior debilidade política, nun momento chave, dado que o goberno da Deputación non está 'atado' ao cento por cento. É dicir, Baltar podería gobernar en minoría, pero ao non ter a maioría absoluta, nada está garantido.