A xustiza ordena reabrir o caso dos insultos machistas contra Carmela Silva
O entón concelleiro de Igualdade de Moraña chamou nas redes sociais “furcia”, “mala zorra” e “filla de puta” á presidenta da Deputación de Pontevedra. A xuíz non vira delito.
A Audiencia provincial de Pontevedra ordena reabrir o caso polos graves insultos machistas que Jorge Caldas, un ex-concelleiro do PP e portavoz de Igualdade no Concello de Moraña, realizou nas redes sociais contra a presidenta da Deputación de Pontevedra, Carmela Silv. “Furcia”, “Filla de puta”, “mala zorra” foron algúns dos insultos proferidos a través de Facebook.
Nun auto ao que tivo acceso a Cadena Ser, a Audiencia pontevedresa revoga integramente a resolución do xulgado de Instrución nº3 de Pontevedra, que arquivara o caso por entender que estes insultos ofensivos entraban dentro da liberdade de expresión. Rexeitou a querela por inxurias que presentara a presidenta da entidade provincial. Porén, a Audiencia considera que si pode haber delito, de aí que ordene reabrir o caso. Entende que o feche do mesmo foi “precipitado” pois non se realizou “dilixencia de investigación algunha”. Que realice esas dilixencias é o que a Audiencia de Pontevedra lle pide agora ao xulgado.
Así, A Audiencia estima os recursos presentados contra o arquivo da causa polo Ministerio Fiscal e a Deputación pontevedresa, que entende que as expresións que realizou Jorge Caldas era “ofensivas e difamatorias” e excedían os límites da “liberdade de expresión”.