A afiliación á Seguridade Social medra 0,65%, lonxe do 1,17% do Estado español

A Galiza aumentou en 6.784 as persoas afiliadas á Seguridade Social en abril, o que supón 0,65% máis respecto a marzo e 1,58% más que en abril de 2022 (+16.318 persoas), segundo os datos publicados onte polo Ministerio de Inclusión, Seguridade Social e Migracións. Malia iso, os ascensos da Galiza sitúanse por debaixo da media estatal, con 1,17% máis de evolución intermensual e 2,98% da interanual. Desta maneira, o total de persoas que cotizan no país queda situado en 1.050.315, após tres meses consecutivos á alza. O aumento das afiliacións á Seguridade Social na Galiza sitúase por baixo da media estatal Por réximes, 824.658 afiliadas e afiliados correspóndense co réxime xeral. Nel, 5.880 son do agrario e 24.128, do fogar, mentres que outros 205.849 son profesionais por conta propia e 19.807 son traballadoras e traballadores do mar. Ademais, segundo o Ministerio, abril rematou con 1.183 persoas afectadas por expedientes de regulación temporal de emprego (ERTE) por causas económicas, técnicas, organizativas ou de produción (ETOP). O emprego baixa da media En relación ao número de persoas desempregadas rexistradas nas oficinas dos servizos públicos de emprego, a Galiza baixou en 2.504 persoas en abril, o que supón un descenso de 1,77% en comparación con marzo, unha caída menor que no conxunto do Estado español (-2,6%), segundo datos publicados esta quinta feira polo Ministerio de Traballo e Economía Social. Desta maneira, nos últimos 12 meses o desemprego caeu no país en 11.259 persoas, 7,48% menos que en abril de 2022. Así, o total de persoas desempregadas galegas sitúase agora en 139.343. Por demarcacións provinciais, o desemprego baixou en Ourense 2,62% en abril con respecto a marzo, con 434 menos, mentres que en Lugo foi de 2,34%, 311 persoas desocupadas menos. Pola súa parte, en Pontevedra descendeu en 913 persoas, 1,66% menos, e na Coruña fíxoo en 846, 1,49% menos. Salarios, empregos e pensións dignas, os eixos das reivindicacións da CIG este 1 de Maio A CIG alerta da cantidade de contratos parciais Desde a CIG, o seu secretario confederal de Emprego, Francisco González Sío, considera que os datos de desemprego que se deron a coñecer son “estacionais”, con motivo da Semana Santa, e “consolidan un modelo laboral no que as traballadoras e traballadores deixan de ser temporais e pasan a ter contratos a tempo parcial”. Subliña, ademais, que “o descenso do desemprego na Galiza foi o terceiro máis baixo por comunidades autónomas”, algo que “probabelmente” teña que ver cunha menor afluencia de peregrinas e peregrinos no Camiño de Santiago, ao non ser 2023 Ano Santo. Porén, o sindicalista considera que os elementos que diferencian o desemprego que hai no Estado español do que hai na Galiza seguen inalterábeis. “58% da poboación desempregada seguen sendo mulleres e 70% das persoas no desemprego concéntrase no sector servizos, que é tamén no que houbo unha maior caída en termos absolutos, de 73%”, sinala. Ademais, engade o dato de que “60% das persoas desempregadas son maiores de 45 anos”. O paro de longa duración na Galiza aumentou 45% nunha década En relación á afiliación media do réxime xeral, Sío indica que se consolidou o novo modelo implantado coa reforma laboral que “ten nome e apelidos”, porque “dos 6.312 novos contratos indefinidos, 2.741 son fixos descontinuos”. A estes engade aqueles que son indefinidos a tempo parcial, co que entre todos “achégase a 60% dos contratos indefinidos nestas formas de contratación precarias”. Respecto da contratación temporal, subliña un dato significativo que é que “no ano 2009 había 54.000 parciais indefinidos, mentres que en 2023 hai 112.000, o que implica que se multiplicaron por máis de dous. O mesmo ocorre cos fixos descontinuos que se multiplicaron por seis pasando de 6.643 no ano 2009 aos 112.998 actuais”. CCOO e UXT: datos positivos, mais con matices Os sindicatos Comisións Obreiras e a Unión Xeral de Traballalores, por outra parte, valoraron positivamente os datos de desemprego rexistrado no mes de abril mais apuntan algúns aspectos que, na Galiza, matizan a súa opinión. Desde CCOO, a súa secretaria de Emprego, Maica Bouza, considera que as cifras agora coñecidas seguen evidenciando “unha peor situación das mulleres no mercado laboral galego” e compórtanse peor que a media estatal como “un reflexo dos problemas estruturais do noso mercado de traballo”. Remítese ás “competencias da Xunta” en políticas sectoriais e cre “negativa” a caída da contratación indefinida e o aumento das persoas afectadas por ERTE, que pasan de 813 a 1.183 nun só mes. O sector servizos aglutina sete de cada dez parados Desde a UXT, o seu secretario de Organización, José Luis Fernández Celis, considera que os datos de desemprego indican “que a reforma laboral reduciu a temporalidade fraudulenta na Galiza e no concunto do Estado español”. Porén, desde o sindicato tamén apuntan que aínda “hai aspectos que teñen que mudar” como é “a temporalidade do sector público, que segundo a última Enquisa de Poboación Activa (EPA) ascendeu a 32,3% no primeiro trimestre, a diferenza da do sector privado, que se reduciu ao 12%, achegándose á existente na Unión Europea”. Ademais, UXT cre que hai que atender o desemprego de longa duración, “que afecta 47.700 persoas que non teñen perspectiva de mellorar no curto prazo”. Para este sindicato, o principal motivo de que teña lugar esta situación “é a nova Lei de Emprego, que non foi impulsada desde o diálogo social, e cuxo contido non ofrece solución ás principais deficiencias dos Servizos Públicos de Emprego do noso país”. A Galiza será a única autonomía que perde emprego en 2023, segundo BBVA Por último, a UXT demanda ampliar a cobertura actual do sistema de prestacións por desemprego que, lembran, no mes de marzo “tan só beneficiou 85.501 persoas".