"Perfumes de luxo, salarios de lixo": O convenio estatal deixa as traballadoras de Perfumerías Arenal con soldos mínimos

"Perfumes de luxo, salarios de lixo”, berraron esta sexta feira empregadas e empregados de Perfumerías Arenal da Coruña nunha concentración que coincidiu cunha xornada de folga para protestar polas súas condicións salariais, e que foi seguida pola práctica totalidade do plantel, segundo os representantes sindicais, que destacan que 70% do persoal, a maioría mulleres, cobra o salario mínimo interprofesional (SMI) malia os avultados beneficios da compañía. A empresa aplica o convenio laboral estatal de perfumarías, de condicións inferiores en materia salarial aos convenios provinciais de comercio minorista vario, acolléndose á norma que até ben pouco estabelecía que os acordos estatais prevalecen sobre os territoriais de orde inferior. Aliás, no caso de Arenal, o convenio estatal é específico para perfumarías, mentres os provinciais que existen na Galiza regulan o sector comercio en xeral. O salario medio galego fica máis de 200 euros por baixo do estatal Segundo denuncia o comité de empresa, composto pola CIG e UXT, esta situación supón que na Galiza existan diferenzas importantes á baixa nas retribucións recibidas polo persoal. A máis afectada é A Coruña, onde na categoría laboral de auxiliar perciben 2.800 euros menos ao ano, aumentando a 4.300 euros no caso das dependentas. Presión reivindicativa A estratexia do comité de empresa de Perfumerías Arenal é centrarse na mobilización reivindicativa. Desde a CIG-Servizos afirman que as mobilizacións en Perfumarías Arenal chegaron logo do intento de negociar unhas condicións salariais máis dignas, atopándose coa negativa da empresa. “Na última negociación asináronse unhas táboas que só tres meses despois foron superadas polo salario mínimo interprofesional”, apunta a central sindical maioritaria na Galiza. Á precariedade salarial súmase a excesiva carga de traballo que ten que realizar o persoal, asumindo de maneira habitual a mobilidade funcional sen a debida compensación económica. Alén da xornada de folga desenvolvida esta sexta feira, o persoal de Perfumerías Arenal convocou outras na A Coruña os pasados 30 de novembro, coincidindo co Venres Negro, e 23 de decembro, en vésperas de Noiteboa. Un día antes desta última data realizaron unha concentración diante das dependencias da compañía situadas no polígono do Ceao en Lugo. A CIG-Servizos denuncia que, a pesar da bonanza económica, a compañía “négase a repartir os enormes beneficios que obtén con quen, precisamente, lle permite gañalos: as traballadoras e os traballadores”. A fenda salarial, lonxe de reducirse, medra na Galiza: as mulleres xa cobran 4.519 euros menos que os homes Mudanza legal no Estatuto dos Traballadores A situación podería cambiar logo da modificación do artigo 84 do Estatuto dos Traballadores, recollida no Real Decreto Lei 7/2023 do Goberno español do pasado 20 de decembro, que estabelece que os convenios negociados nas autonomías teñan prioridade aplicativa sobre os de ámbito estatal, sempre que recollan condicións máis favorábeis para as traballadoras e os traballadores. Esta mudanza normativa recolle as demandas do sindicalismo nacionalista galego, vasco e catalán, e afianza a recuperación dun dereito perdido coas últimas reformas laborais impulsadas polos diferentes Gobernos españois nos últimos anos, que foron agresivas para os convenios sectoriais autonómicos e mais provinciais. Roberto Pérez Vila, secretario da CIG-Servizos da comarca da Coruña, sinala a Nós Diario que dita reforma legal “podería afectar a Perfumerías Arenal se a patronal galega do sector tivese a ben negociar un convenio autonómico, pero a día de hoxe Arenal non está por acordar absolutamente nada e insiste en prescindir de calquera vía de negociación. Van ao bruto e listo, a non respectar nada e a non falar con ninguén”. Pérez Vila subliña que, ante esta actitude da empresa, as mobilizacións continuarán. Haberá novas asembleas de traballadoras para decidir futuras datas de folgas e concentracións. Valoración positiva A CIG fai unha valoración “moi positiva da modificación do artigo 84 do Estatuto dos Traballadores ao responder, en parte, á histórica reivindicación de que os convenios negociados na Galiza teñan prioridade aplicativa sobre os de ámbito estatal”. Os beneficios empresariais comen terreo aos salarios no peso sobre a riqueza galega En palabras do secretario xeral da central sindical nacionalista galega, Paulo Carril, esta mudanza na lexislación laboral “constitúe unha oportunidade para reforzarmos o marco galego de relacións laborais e fortalece a capacidade da clase traballadora galega para loitar pola mellora das súas condicións laborais e salariais”. O responsábel da CIG tamén subliña que "estamos ante o recoñecemento do dereito a poder democratizar as relacións laborais e a negociación colectiva, que algunhas organizacións sindicais pretenden secuestrar en mesas en Madrid". Ademais, o Real Decreto Lei 7/2023 reforza a aposta do sindicalismo nacionalista polos convenios sectoriais de ámbito galego. A CIG remarca a necesidade de avanzar “nun acordo interprofesional galego de estrutura da negociación colectiva que sirva para protexer os convenios provinciais da colonización por parte dos estatais”. Neste senso, a problemática de Perfumerías Arenal tería unha porta aberta á solución. A presión das mobilizacións do persoal da compañía podería ser chave para que a patronal decida negociar. A compañía Arenal presentou beneficios récord nos últimos anos Perfumerías Arenal foi creada en 1975 pola familia lucense Vázquez Marzán, e ten a súa sede principal no polígono do Ceao de Lugo. A saúde económica da compañía está fóra de toda dúbida. Cunha rede de 70 tendas distribuídas entre o norte e o oeste do Estado, en 2022 duplicou beneficios respecto a 2019, ano en que o grupo de orixe portugués Sonae MC mercou 60% das accións, quedando o restante en mans dos fundadores. A empresa portuguesa obtivo o ano pasado unha facturación de 6.000 millóns de euros. Arenal fechou o exercicio do ano pasado cun resultado de facturación de 198 millóns de euros, logrando uns beneficios de 11 millóns. Tres anos antes, e coincidindo coa entrada de Sonae MC no accionariado, as vendas ascenderon aos 129 millóns cunhas ganancias de 5´5. Alén disto, Perfumerías Arenal anunciaba en xuño deste ano unha fusión con Druni, empresa minorista de perfumaría, cosmética e mais parafarmacia cunha rede de arredor de 400 tendas no Estado español, situadas principalmente en Valencia, Catalunya e Madrid. Fundada no ano 1987 polos seus actuais accionistas, a familia Casp, Druni xerou unha facturación de 575 millóns de euros o pasado ano. Os ingresos de máis de 201.000 persoas na Galiza están por baixo do salario mínimo O CEO de Perfumerías Arenal, Rafael Marzán, anunciaba o pasado outubro durante un congreso empresarial en Zaragoza que a entidade que dirixe agarda un crecemento para 2024 entre un 10 e un 12%, así como un plan de expansión de tendas por diversas zonas do Estado español nas que aínda non ten presenza.