Persoal de Teleperformance sae á rúa contra o ERE a 38 traballadoras

Máis de medio centenar de persoas concentráronse na Coruña en contra do expediente de regulación de emprego (ERE) anunciado por Teleperformance España e que afecta a 310 persoas no conxunto do Estado español e a até 38 no centro da Coruña. A empresa alega causas organizativas e produtivas.

Fixérono coreando proclamas como 'ERE e despedimentos para os directivos', 'O noso sacrificio, o seu beneficio' ou 'Non ao ERE en Teleperformance' durante unha protesta que coincidiu cun paro de 24 horas do que os sindicatos cifraron o seguimento en 74%. Segundo explicou a presidenta do comité de empresa, María Jesús Rey, a medida afecta a 38 traballadoras e traballadores do centro da Coruña, situado na rúa Newton.

"A empresa duplicou os seus ingresos e recentemente anunciou unha OPA [oferta pública de adquisición] sobre o grupo Majorel", asegurou Rey, que rexeitou que existan motivos para o ERE. "Non nos achegan documentación que acredite causas produtivas e organizativas", insistiu. Así se manifestou Rey coincidindo cunha protesta que decorreu ante a sede de Vodafone, na coruñesa praza de Pontevedra. Ademais, non descartaron convocar novas mobilizacións.

"Non vemos que sobre xente, non paramos de atender chamadas en ningún dos centros e nas campañas", engadiu sobre as que realizan para Vodafone ou Netflix. No caso da Coruña, precisou que, de acordo cos datos dos que dispoñen, 35 das persoas ás que afectaría o ERE son teleoperadoras, unha coordinadora e dous formadoras.

Os despedimentos materializaranse, de consumarse o ERE, a comezos de novembro. Desde o comité, indican que "este novo golpe á economía coruñesa é maior se temos en conta que o cadro pasou de máis de 900 persoas ás 515 que están a traballar actualmente no centro".