O Sergas recibiu 75 denuncias por acoso laboral e discriminación entre 2017 e 2023

A CIG-Saúde vén de denunciar nunha comparecencia en Santiago que o protocolo de acoso e discriminación laboral no Servizo Galego de Saúde (Sergas) está paralizado. Segundo datos facilitados pola central nacionalista, da Comisión Técnica do Observatorio de Violencia Laboral do propio departamento da Administración galega, desde 2017 até maio de 2023 recibíronse un total de 75 denuncias por acoso laboral e discriminación no traballo. En concreto, a área sanitaria con máis casos foi a da Coruña-Cee (32), seguida da de Vigo (17) e a de Santiago-O Barbanza (13). No total de denuncias eses anos, 70 foron por acoso laboral e cinco por discriminación. Porén, a central nacionalista desconfía destas cifras. Por este motivo compareceron en rolda de prensa por parte da sección da CIG-Saúde a responsábel de muller e igualdade, Irene Tato; a secretaria organización, Ana Lestón; o secretario nacional, Manolo Moreira; e a membro da executiva Lucía Peón. Sen contar co acoso por orientación sexual En declaracións a Nós Diario, Irene Tato explica que o primeiro Plan de Igualdade entre mulleres e homes no Sergas data de 2021. “Nel contemplábase como medida a adoptar a actualización do procedemento de actuación ante o acoso laboral e outras discriminacións no traballo, ademais de analizar de maneira específica o acoso de tipoloxía sexual valorando que fose centralizado na Dirección do Sergas coa intención de dotar dunha maior confidencialidade o proceso”, asegura. Porén, esta sindicalista afirma que “até decembro do 2023, no seo da Comisión Técnica de Igualdade, non nos presentan un protocolo de acción e prevención contra o acoso sexual e por razón de sexo”. Ademais, no documento que achega a Administración galega, “non se contempla o acoso laboral ou discriminación por razón da orientación sexual, identidade ou expresión de xénero nin ningunha medida preventiva”. CIG-Saúde denuncia que o Sergas mantén paralizada a negociación do protocolo de acoso Sen cumprir as medidas do Plan de Igualdade “A actualización do protocolo é unha medida que tiña que estar xa feita no ano 2022”, considera Tato, “e non se fixo a avaliación na metade do período de vixencia do plan, que determina o grao de cumprimento, eficacia das medidas e tampouco se fixeron os informes anuais sobre a aplicación do plan”, agrega. Ademais, a central nacionalista lembra que durante 2022 e 2023 houbo cambios lexislativos “importantes” que o Sergas non tivo en conta. Estre os máis salientábeis figuran a ratificación do Estado español do Convenio 190 da Organización Internacional do Traballo (OIT) sobre a eliminación da violencia e acoso no mundo do traballo, que entrou en vigor o 25 de maio de 2023, así como a Lei 4/2023 de 28 de febreiro, para a igualdade real e efectiva das persoas trans e para a garantía dos dereitos das persoas LGTBI. Desde a CIG demandaron, en varias ocasións, “unificar nun só documento as diferentes tipoloxías de acoso” sen obter resposta na última reunión da Comisión Técnica de igualdade do pasado 10 de maio nin nun escrito posterior, rexistrado o 3 de xuño. Nova sección de Igualdade "silenciada" A central nacionalista indica que neste último semestre o Sergas creou unha sección de Igualdade que, polo de agora, “parece inexistente xa que está silenciada ante este tipo de situacións”. Tato asegura que nela “nin sequera se estabelece un plan formativo que garanta preparación en materia de igualdade de nivel medio para todas as persoas con responsabilidades en materias de igualdade e nivel superior que dea unha alta competencia de coñecementos para a aplicación práctica”. Para a CIG-Saúde, as consecuencias para as traballadoras da sanidade galega ante estes incumprimentos normativos van desde “unha falta de formación ao persoal no relativo a denuncia ou tramitación dun caso de acoso” até a súa “desprotección por falta de información sobre casos de acoso, seguimento e resolución ou expedientes disciplinarios”. Por este motivo, denuncian que están expostas “a riscos psicosociais”, como consecuencia de que o Sergas “fomenta unha cultura laboral negativa”. Neste sentido, denuncian a “falta de mellora das condicións laborais e da calidade de vida das persoas traballadoras” implantando “unha cultura que rexeite a violencia e o acoso”. CIG-Saúde denuncia que a dirección do Sergas leva 133 días "paralizada" A central nacionalista pon énfase en que, a día de hoxe, “non hai unha planificación de adopción de medidas derivadas da enquisa de riscos psicosociais” nin tampouco contan os servizos de prevención “con recursos para levar a cabo a actividade preventiva”. Ante esta situación, desde a CIG-Saúde aseguran que seguirán "tomando as medidas correspondentes para que o Sergas cumpra coa normativa vixente" e incidindo en velar para que "se garanta unha seguridade e saúde nos postos de traballo". Por este motivo urxen a que a Administración galega "proceda á negociación canto antes dun protocolo onde se recollan todos os tipos de acoso e se aborden tanto as medidas preventivas como o marco de actuación dirixido a protexer a todas as persoas traballadoras de calquera situación de violencia ou acoso no traballo". Desde a CIG-Saúde conclúen que, se non se leva a cabo canto antes, estarían nunha posición "indefendíbel" posto que "permitir o acoso tamén é acosar". A Valedora recibiu 217 denuncias de discriminación entre 2016 e 2022 A Valedora do Pobo recibe cada ano queixas diversas relacionadas con administracións, organismos e institucións públicas. Anualmente publica un informe no que dá a coñecer, por áreas, as que recibiu e tramitou en cada exercicio. Entre 2016 e 2022 (cos datos de 2023 aínda sen publicar por esta institución) a cifra total de casos dentro da área denominada “Queixas de discriminación por razón de identidade sexual e identidade de xénero” foi de 2017. Por anos, o maior número de queixas oscilou entre as 14 de 2016, as 9 de 2017 e as 8 de 2022. Como excepción estaría o ano 2019, no que se rexistraron un total de 170, das que 166 formaron parte dunha queixa colectiva relacionada coa distribución por parte da asociación Hazte Oír de folletos presuntamente en contra da realidade LGTBI+ no eido da educación. A Xunta arquiva un caso de 'mobbing' sen escoitar a acosada mais tendo en conta o testemuño da xefa, "responsábel" do acoso A Valedora do Pobo conta como marco xurídico para tramitar as queixas con varias leis, entre as que está a Declaración Universal dos Dereitos Humanos e a Convención sobre os Dereitos da Infancia. A súa función, neste caso, é garantir a igualdade de trato e a non discriminación de lesbianas, gais, transexuais, bisexuais e intersexuais en todos os ámbitos da vida. De acordo con este marco legal, correspóndelle iniciar de oficio, ou a instancia de terceiras persoas, investigacións sobre posíbeis situacións de discriminación que revistan unha especial gravidade ou relevancia, excepto as que revistan carácter de infracción penal que deberá remitir á Fiscalía ou á autoridade xudicial.