Estas son as claves da reforma do subsidio por desemprego e da prevalencia dos convenios autonómicos sobre os estatais e sectoriais

Entre as medidas que acompañarán a reforma do subsidio de desemprego estará de novo a prevalencia dos convenios autonómicos sobre os estatais e sectoriais sempre e cando contemplen unha mellora para o persoal laboral. A prevalencia, unha reivindicación histórica de sindicatos nacionalistas como a CIG, estará condicionada tamén a que obteña o respaldo das maiorías exixidas para constituír a comisión negociadora. A mesma prioridade aplicativa terán os convenios colectivos provinciais cando así estea previsto nos acordos interprofesionais autonómicos e a súa regulación resulte máis favorábel. Con todo, considerarase non negociábel, tanto a nivel autonómico como no provincial, o período de proba, as modalidades de contratación, a clasificación profesional, a xornada máxima anual de traballo, o réxime disciplinario, as normas mínimas en materia de prevención de riscos laborais, así como a mobilidade xeográfica. Esta medida, anunciada pola ministra española de Traballo, Yolanda Díaz, tras o Consello de Ministros e Ministras, foi criticada polas principais organizacións sindicais e patronais do Estado antes de que a anterior reforma do subsidio de desemprego fora tombada no Congreso pola negativa de PP, Vox, UPN e Podemos. CCOO asegurou onte que a medida aprobada polo Goberno estatal "supón unha intromisión nas funcións, que o artigo 7 da Constitución Española, atribúe ás organizacións sindicais e empresariais" e lamentou que o Ministerio apostase pola regulación "sen contar cos axentes sociais" (referíndose ao chamado diálogo social, do que fica excluído a CIG a pesar de ser o principal sindicato da Galiza). As patronais sinalaron a comezos de ano que a medida "atenta contra a unidade de mercado" no Estado. Porén, a prevalencia dos convenios autonómicos acordouse no pacto de investidura do PNV e o PSOE. Subsidio por desemprego O Goberno español aprobou onte o Real Decreto-lei polo que se reforma o subsidio asistencial por desemprego, dando así cumprimento a un dos fitos asociados ao cuarto pago dos fondos europeos. A reforma, acordada con CCOO e UXT e que non subscribiron as patronais, contempla un aumento por tramos da contía, actualmente de 480 euros ao mes, amplía os colectivos beneficiarios e permitirá compatibilizar cun salario tanto o subsidio como a prestación contributiva de desemprego. O paro poderá ser compatibilizado con salarios por baixo dos 2.250 euros ao mes O decreto sobre o subsidio por desemprego, que entrará en vigor con carácter xeral en novembro deste ano, incorpora algunhas novidades respecto ao que tombou o pasado xaneiro o Congreso español, como as referidas á compatibilidade das axudas por desemprego cun posto de traballo. Esta compatibilidade cun salario tanto do subsidio como da prestación contributiva por desemprego se instrumentará a través do 'complemento de apoio ao emprego', que se poderá prolongar durante un período de 180 días. O subsidio será compatíbel coa percepción dunha bolsa de estudos No caso do subsidio, cuxa duración máxima seguirá sendo de 30 meses, a compatibilidade será posíbel por cada novo emprego a tempo completo ou parcial, sen redución da contía, tras esgotar un ano de subsidio. Ademais, o subsidio será compatíbel coa percepción dunha bolsa. No caso da prestación contributiva, poderase compatibilizar cun emprego tras un ano cobrando prestación e sempre que o salario non supere os 2.250 euros ao mes, nunha medida operaría a partir de 2025. Ademais, a reforma elimina o mes de espera para as persoas que esgotasen a súa prestación contributiva e queiran solicitar o subsidio por desemprego. Así, cobrarase desde o primeiro día. Por outra parte, mantense en 125% do salario mínimo interprofesional (SMI) a base de cotización para os subsidios de persoas maiores de 52 anos, fronte á rebaixa que introducía a primeira reforma e que motivou o rexeitamento de Podemos no Congreso. A reforma mellora as contías dos subsidios durante os 12 primeiros meses de percepción, estabelecendo tres tramos: o subsidio será de 95% do Indicador Público de Renda de Efectos Múltiples (Iprem) durante os primeiros seis meses de cobranza (570 euros mensuais co Iprem actual), de 90% durante os seguintes seis meses (540 euros) e do actual 80% durante o resto da duración (480 euros). Ao subsidio poderán acceder agora persoas de 16 ou máis anos que fosen vítimas de violencia de xénero ou sexual, así como emigrantes retornados, menores de 45 anos sen cargas familiares e persoal laboral eventual agrario. Elimínanse tamén os subsidios parciais para quen non traballe a tempo completo, podendo cobralos íntegros, á vez que se permitirá que as persoas con menos de 12 meses cotizados (os necesarios para acceder a unha prestación contributiva) poidan acceder ao subsidio. Facilítase, por outro lado, o cumprimento do requisito de insuficiencia de rendas para acceder ao subsidio, ao permitir tanto a insuficiencia persoal como a familiar, e ampliarase a cobertura ao permitir o acceso das parellas de feito á unidade familiar. En concreto, múdase o cómputo de renda de tal maneira que non se excluirá ao solicitante que supere 75% do salario mínimo, senón que se terá a consideración de responsabilidades familiares cando o total de rendas da unidade familiar entre o número de persoas que a forman, incluído o solicitante, non supere 75% do SMI. O despedimento automático por incapacidade fica prohibido Entre as medidas incluídas no decreto da reforma do subsidio do desemprego tamén destaca a prohibición do despedimento automático por incapacidade. Ademais, a persoa con discapacidade poderá elixir se quere que a súa relación laboral se extinga ou, pola contra, se quere permanecer no posto de traballo, o que implicaría adaptar os seus cometidos. En concreto, a modificación do artigo 49.1.e) do Estatuto dos Traballadores eliminará a referencia á extinción automática por grande incapacidade, incapacidade permanente absoluta e incapacidade permanente temporal, separando con iso estas causas "da morte da persoa traballadora". A normativa estabelece un prazo de seis meses, no ámbito do Ministerio de Inclusión, Seguridade Social e Migracións, para emprender cambios nas invalideces de carácter permanente e os seus distintos graos e na compatibilidade da pensión de incapacidade permanente cun emprego. Ausencia por lactación Por outra parte, o decreto tamén prevé a posibilidade de acumular as horas retribuídas de ausencia por lactación como un dereito, sen necesidade, por tanto, de que estea recollido no convenio colectivo ou nun acordo coa empresa.