É imposíbel que a política non atravese, dun xeito ou doutro, a poesía dun autor palestino. É o caso da obra de Najwan Darwish (Xerusalén, 1978), que esta segunda feira, 28 de maio, compartirá escenario na Coruña con Antón Blanco (Vilagarcía de Arousa, 1996), dentro do ciclo Poetas Di(n)versos.
A Fermin Muguruza non hai fronteira que se lle resista. Para atravesar a última, acompañouno o dúo catalán de “electrónica de combate” The Suicide of Western Culture. Este sábado 26 de maio, ás nove da noite na Sala Capitol de Compostela, expón as conclusións da travesía: o disco B-Map 1917+100.
Se a condición de xigante ten sentido ao falar de literatura é por autores como Philip Roth. Novelista principal do século XX, o estadounidense que atacou o puritanismo en O lamento de Portnoy (1979), afondou na convulsa historia do seu país na serie de Nathan Zuckerman e realizou un prego de cargos sobre a súa vida e a súa familia no tramo final -a serie titulada Némese- da súa descomunal obra narrativa. Morreu esta terza feira en Nova York.
A falta de coñecer as fitas a concurso, a 13ª edición da Mostra Internacional de Cinema Etnográfico do Museo do Pobo Galego abrirá as súas interesantes seccións paralelas ao cinema realizado por mulleres. Será na sede compostelá da institución entre o 4 e o 11 de xuño.
O filme máis premiado do cinema galego último, Dhogs, estreouse a pasada fin de semana en 12 salas, dez galegas, unha catalá e outra en Madrid. “Está funcionando moi ben”, apuntan desde a produtora cinco días despois da súa posta de longo na pantalla grande.
Unha espiral de bolos de granito con versos gravados a ferro. Eis o Xardín das Pedras que Falan, a iniciativa do escritor Suso de Toro asumida polo Concello de Compostela e mais a universidade para crear “un lugar de devoción polas palabras”.
Serpe de cristal (Galaxia, 2018) son once cancións en que toman a palabra a abella, o golfiño, a píntega, o reiseñor, a bubela. Conforman o novo libro disco de Pirilampo, o proxecto de música infantil liderado por Xosé Lois Seixo.
O Día das Letras Galegas dedicado a María Victoria Moreno está servindo, tamén, para reivindicar o papel das mulleres na literatura e na cultura. A iso dedicará a asociación Eira da Xoana a xornada do vindeiro sábado, 19 de maio, na súa sede en Ramil (Agolada).
Detrás da súa mítica figura -traxe branco, garavata rechamante e chapeu de ala-, agochábase unha das voces xornalísticas máis agudas, por veces conservadora, atenta ao novo e irónica da literatura estadounidense. Tom Wolfe morreu esta segunda feira en Nova York. Tiña 87 anos.
O segundo filme de Plácido Romero chámase O Tempo na Luparia. A medio camiño entre o cinema ensaio e o documental, rexistra o paso do tempo “e o tempo que reside no pobo” na Raia Seca. Mais concretamente no Concello de Lobeira. Este serán ás oito estréase no Centro Cultural Marcos Valcárcel de Ourense.
“Aínda que non escribise, só polo que fixo ate 1973, polo seu maxisterio, o seu compromiso coa lingua, María Victoria Moreno xa merecería o Día das Letras”. Eis o primeiro que sinala a escritora e académica Fina Casalderrey (Xeve, 1951) cando é preguntada pola autora de Anagnórise: “Foi unha gran descoñecida, porque entre as súas prioridades non estaba a conquista dos escaparates”.
En apenas tres días, o manifesto Nós non imos ficar caladas! en defensa do Diario Cultural da Radio Galega recadou máis de 3.200 sinaturas de apoio. Desta circunstancia deron conta esta segunda feira tres dos seus promotores.
O músico e escritor Xurxo Souto é o cronista da Coruña secreta. Dunha cidade cuxa memoria foi negada durante anos. O 17 de maio, Día das Letras Galegas, volverá demostralo cun roteiro guiado arredor da Torre de Hércules.
A primeira versión audiovisual en ficción da vida de Rosalía de Castro, Contou Rosalía, preestréase esta sexta feira en Compostela. Trátase dunha miniserie sobre a estadía madrileña da poeta coa actriz luguesa Melania Cruz no papel da autora de Follas Novas.
Cando María Victoria Moreno chegou como profesora ao Lugo de 1965 atravesou unha derrega. “Galiza enteira amosouse aos meus ollos, na súa problemática e na súa lingua”, chegou a dicir anos despois. A Ánxela Gracián, autora da biografía novelada Doce cartas a María Victoria Moreno, aínda a conmove este “compromiso”.
Un grupo de intelectuais e artistas veñen de difundir un manifesto en defensa do Diario Cultural da Radio Galega, que a dirección da emisora pública deixara de emitir no formato actual despois de 28 anos en antena.
A quinta edición dos premios Martín Códax da música, organizada pola asociación Músicos ao Vivo, entregou onte as súas 18 distincións. Fíxoo nunha gala no Pazo da Cultura de Pontevedra en que a nova voceira da organización, a cantante Sonia Lebedinsky, reivindicou a música como lugar de encontro, traballo, ilusió e militancia.
O desmantelamento do Diario Cultural tal e como se coñecía despois de 28 anos de emisión na Radio Galega está provocando unha enorme vaga de reaccións no mundo da cultura. Asociacións profesionais, intelectuais, xornalistas, escritoras, deputadas ou organizacións políticas amosan a súa indignación e rexeitamento nas redes sociais e en comunicados.
Entres os múltiples labores aos que se entregou María Victoria Moreno tamén se atopa a análise literaria. Unha acabada mostra dela recóllea É a lúa que baila... María Victoria Moreno e a lírica dos Seis poemas galegos de Federico García Lorca (Galaxia), que responde con exactitude ao seu título. A escritora párase nun dos poemas en galego do andaluz e traza xenealoxías, mecanismos e paisaxe.
Pioneira da literatura infantil e entregada á causa docente. Eis os eixes sobre os que construír calquera achegamento biográfico a María Victoria Moreno. Tamén o realizado por Isabel Soto e Xavier Senín, de susbtítulo Sementadora de futuro (Xerais, 2018), quen abordan outras variadas facetas da protagonista do Día das Letras 2018.
