cultura

O Día das Artes Galegas centrarase este ano no arquitecto pontevedrés Alejandro de la Sota. A celebración, convocada pola Real Academia Galega de Belas Artes para o vindeiro 14 de abril, homenaxea así o que denominan “o máis notábel arquitecto” no Estado español durante a segunda metade do século XX.
 

Por que un museo contén as pezas que conten. Cales son as súas funcións e os seus límites. Con quen dialogan. De onde proceden os seus fondos. Que explican sobre a historia de Galiza. Estas e outras cuestións próximas son as que levaron á historiadora Sabela López Pato a organizar a mostra Fóra dos museos, cuxo primeiro episodio -dun total de seis ao longo de oito meses- pode visitarse na libraría Numax de Compostela.
 

O tren é unha das metáforas recorrentes que atravesan a historia do cinema practicamente desde o seu nacemento. E un tren é tamén o corazón de Nós mesmas, a curtametraxe coa que debuta nas pantallas Ana Pontón (Sarria, 1977). Si, a mesma Ana Pontón que exerce como portavoz nacional do BNG.
 

Da guitarra de Miguel Mosqueira (Lalín, 1982) proceden algunhas das máis inconfundíbeis melodías do pop galego contemporáneo. É un dos tres membros fundadores que resisten en Ataque Escampe, organizados en 2001 e responsábeis dunha cromática e singular traxectoria. Entre o infrarock acústico dos inicios e o tropicalismo agridoce do último traballo -Primeiros Bicos (2017)-, a banda pecorreu as estradas principais e secundarias da música do país.

Nove de novembro é o primeiro filme galego centrado nunha relación gay. Dirixida por Lázaro Louzao (Xove, 1988), a película narra os derradeiros días dunha parella que, tras dez anos xuntos, comeza a crebar. A cinta está enmarcada no ano 1989, coincidindo coa caída do muro de Berlín e a posterior absorción da República Democrática Alemá por Occidente.

A quinta edición do Carballo Interplay acaba de apresentar o cartaz da súa sección oficial, que escolleu 42 propostas entre as mais de 250 que chegaron de todo o globo. A directora do festival, Sonia Méndez, e a responsábel da gala e webseries, Sandra Lesta, anunciaron esta cuarta feira que o evento, que terá lugar do 4 ao 7 de abril, repartirá máis de 5.000 euros en premios.

Bob Dylan non é Bob Dylan. É un medio, non un fin. A súa progresiva disolución no magma das músicas de raíz do territorio actualmente coñecido como Estados Unidos é un regreso a casa. Media vida como un rolling stone, a outra media á procura de comprender o folclore, os seus misterios, os seus mecanismos. O pasado sábado ofreceu en Salamanca o primeiro dos seus concertos no Estado español e confirmou a súa penúltima metamorfose.
 

Bueu saúda con cultura o Día Mundial do Teatro. Na súa acepción máis extensa, sempre en relación coas letras: do cancioneiro infantil de tradición oral á poesía de vangarda. Esta terza feira, 27 de marzo, e dentro do ciclo Bueu Espazo para a Cultura -organizado polo concello coa colaboración da Deputación de Pontevedra- ofrece a representación de As historias do avó Manuel e mais un recital a partir de Manuel Antonio.
 

A Asociación Galega de Editoras (AGE) conta, por primeira vez, cun posto propio na Feira Internacional do Libro Infantil e Xuvenil de Boloña. Organizado en colaboración coa entidade de xestión de dereitos Cedro, nel están presentes nove das principais empresas do gremio en Galiza.
 

A primeira edición do festival de poesía Alguén que respira! de Compostela deixará pegada. Polo menos en forma de libro. Un volume editado por Política Lingüística e mais o concello recolle obra de todos as autoras participantes e algunha importante novidade: un avance dos novos poemas de Olga Novo ou as primeiras traducións ao galego do inglés Andrew McMillan e do sirio Mohamad Frias.
 

Dezasete sílabas, unha idea -dúas ao máximo-, e unha sensibilidade aguda sobre os cambios de luz e o devalo das estacións. Velaí unha definición posíbel do haiku, unha das formas mínimas do poema, importada de oriente. Helena Villar Janeiro (Becerreá, 1940) publica agora medio cento deles en Poesía mínima (Alvarellos).
 

“Coa mesma convicción de que poesía está nos bares, volveremos encher de poesía unhas cantas barras”. A partir desta idea, Ponme un poema! leva poemas aos despachos de bebidas espirituosas o sábado 24 de marzo en Allariz. E farao da man de Samuel L. París e a cantora Mónica de Nut.