A Asociación Galega de Editores (AGE) quere que a Xunta volva estar presente nas feiras internacionais do libro. Así o expresaron nun comunicado emitido despois de se reunir co secretario xeral de Cultura Anxo Lorenzo a petición deste último.
Para o escritor Lois Diéguez (Monforte de Lemos, 1944), viaxar é un método fundamental do seu traballo. En rexistros moi diferentes, Viaxes ás terras encantadas de Lemos (1999) ou O canto do muecín (2007) dan fe dentro da súa obra. Por iso non é de estrañar que agora dirixa un obradoiro sobre viaxes.
Dezasete nominacións valéronlle ao thriller Dhogs de Andrés Goteira ser a virtual pre gañadora dos premios Mestre Mateo deste ano. Hoxe fixéronse públicas as entidades e profesionais finalistas na XVI edición dos premios Mestre Mateo. A gala do audiovisual galego, que se celebrará o 3 de marzo no Pazo da Ópera da Coruña, estará conducida pola actriz Iolanda Muíños.
É un dos cineastas fundamentais da contemporaneidade. Enormemente influente e, ao tempo, radical e voluntariamente marxinal, o francés Jean-Luc Godard (París, 1930) leva axitando as pantallas desde que en 1959 dirixiu À bout de souffle. A filmoteca galega dedícalle agora un pequeno ciclo a propósito do filme inédito Grandeza e decadencia dun pequeno comercio de cinema.
Hai medio século, Álvaro Cunqueiro ofrecía o primeiro pregón da Feira do Cocido de Lalín. Este domingo, o presidente da Real Academia Galega, Víctor Freixanes, tomoulle o relevo. “A cociña é unha das grandes catedrais da cultura galega, a crónica histórica da maneira de vivir dun pobo, do seu xeito de entender a vida”, afirmou ante centos de veciñas e veciños.
Se existe unha poética singular na música galega posterior a Os Resentidos, é a de Xurxo Souto (A Coruña, 1966). Responsábel intelectual desa inaudita colisión entre punk rebelde e canción popular chamada Os Diplomáticos de Monte-Alto, da súa pluma e voz saíron auténticos himnos subalternos, de orgullo rururbano e conciencia arroutada, onde se celebraba a vida dos de abaixo.
É unha das propostas máis singulares e arriscadas das músicas populares contemporáneas: a vasca Maite Arroitajauregui, Mursego. Este sábado presentará no Centro Galego das Artes Contemporáneas de Compostela o seu último disco, 100% Oion, dentro do festival Escenas do Cambio.
A traxectoria do pianista e compositor Nani García (A Coruña, 1955) abala entre dous territorios: o do jazz e o do cinema. Fúndense no seu último disco, Cinematojazzía, que este sábado, 3 de febreiro, presenta no Garufa Club, da Coruña.
As gabetas de Neira Vilas aínda non están baleiras. A máis de dous anos da súa morte, o autor de Memorias dun neno labrego (1961) segue presente no andel de novidades das librarías. A editorial Galaxia vén de anunciar a publicación de dous libros inéditos.
A Consellaría de Cultura vén de remitir unha carta á Asociación Galega de Editores (AGE) en que lles comunica a súa decisión de se borrar de catro das cinco feiras internacionais do libro en que viña participando. Para o departamento que encabeza Román Rodríguez, só ten “interese para o país” a feira de Bos Aires.
Son un dos segredos mellor gardados do pop galego. Ou non tan gardados: desde hai algo máis de dous anos, Oh Ayatollah prodíganse polo país. Mais esta sexta feira, estrean o seu primeiro disco longo, Volve a canción protesta, arroupados pola plana maior da escena na Sala Capitol de Compostela.
O Goberno galego non estará en catro das cinco feitas internacionais do libro en que viña participando. A decisión unilateral, que incluíu acusacións de “desinterese” contra o sector editorial tildadas por este de “falsidade”, provocou reaccións dos axentes implicados. Agora é o grupo parlamentario do BNG o que esixe explicacións á Xunta.
Aqueles versos que Méndez Ferrín, no seu prólogo á poesía de Heriberto Bens, denominou “tridentinos” centran a atención de Díaz Castro: poeta en formación (1914-1939), o penúltimo ensaio -acaba de publicar con Xurxo Martínez Común temos a patria- de Emilio Xosé Ínsua. Esta quinta feira preséntao en Compostela, ás 19.45 na Libraría Couceiro.
A decisión unilateral da Xunta de suspender a súa presenza en catro das cinco feiras internacionais do libro ás que viña asistindo está a suscitar as protestas dos sectores implicados. A voz da Asociación de Escritores en Lingua Galega (AELG) únese á dos editores e pide ao Goberno que “reconsidere a súa decisión”.
Álvaro Gago (Vigo, 1986) recibía hai uns días o premio do xurado no Festival de Cine de Sundance, en Estados Unidos, por Matria. A curtametraxe, localizada na Arousa, conta a historia de Francisca Iglesias Bouzón, operaria de conserveira e cunha realidade a través da que o director bota luz sobre o falso mito do matriarcado en Galiza.
Na prehistoria cultural do movemento afroamericano polos dereitos civís sucedeu o Rexurdimento de Harlem. Aquela explosión, localizada en Nova York, en que agromaron indicios de pequena burguesía negra e o jazz popularizouse, franqueou o paso a unha literatura propia, autónoma respecto do canon estadounidense. Pasar (1929), de Nella Larsen, é peza central desta historia. Agora publícase en galego, versión de Carlos Valdés, e publicada por Irmáns Cartoné.
O primeiro disco de Atrás Tigre publicouse en 2017. Fainos saír sucede nun lugar bretemoso, en que a herdanza do pop británico melancólico bate con ecos shoegaze ou as derivadas máis amábeis do post punk. Olalla Cociña (Viveiro, 1979), tamén poeta, é a responsábel de teclados e voces da banda.
Nese territorio que non é nin a terra nin o mar, sobre o que se despregan as mareas e onde se cruzan universos, escribiu Antón Lopo Corpo, o libro de poemas co que vén de gañar a sexta edición do premio Lueiro Rey. “O elemento central é a noda, ese espazo híbrido que non é auga nin area, e que eu chamo perímetro nómada”, define.
Foi talvez a voz máis salvaxe da poesía dos 90. Os seus textos relataban vidas periféricas en pequenas cidades grises, o traballo como condena e explotación, unha rabia existencial sen concesións, pouca esperanza. Aquela ollada directa, dura e sensíbel a un tempo, ocupou tres libros de poemas, un de relatos e unha novela. Despois esvaeuse. Agora, Kiko Neves (Ponteareas, 1969) regresa, mais ao vivo e con músicos á beira.
