Castelao: de chumbo a verba narra a historia dun alumno a facer un traballo sobre Castelao. Con forma de documentario ficcionado, achégase á vida do intelectual e líder do Partido Galeguista e facilita o acceso ao seu pensamento e obra. Esta sexta feira, 25 de xaneiro, proxectarase ás 20.30 horas no Teatro Principal de Pontevedra.
O profesor Xosé Ramón Veiga Alonso presenta esta sexta feira en Foz o seu último libro, Poder e política na Galiza vilega (editorial Bolanda). Centrada nas antigas provincias de Lugo e Mondoñedo e no período que vai de 1790 a 1833, a obra analiza o esboroamento do Antigo Réxime e a súa pelexa a vida ou morte co liberalismo.
O cineasta Álvaro Gago (Vigo,1986) recibiu o premio do xurado do Festival de Cine de Sundance pola súa curtametraxe Matria. A curta aspira a deitar luz sobre o que entende como falso mito do matriarcado en Galiza.
Aires de Pontevedra é o título do espectáculo musical creado por Oscar Ibáñez a partir do seu último traballo discográfico: Aires de Pontevedra. Homenaxe a Ricardo Portela - 25 Aniversario Pasamento. Nel, Ibáñez recolle a tradición e singularidade musical do gaiteiro de Viascón, mestre e pioneiro da gaita contemporánea, Ricardo Portela.
Os 50 debuxos orixinais do álbum Nós, realizados por Castelao entre 1916 e 1918 e publicados en libro en 1931, veranse no Museo de Pontevedra, institución á que foron cedidos por un período de cinco anos. Ate agora só en parte se atopaban a disposición do público. Unha reforma das salas 1 e 2 do Sexto Edificio do museo permitirao.
Non é o instrumento máis habitual como protagonista dun disco. E porén poboa, discreto, multitude de obras folk, bluegrass, rock americana, ou portuguesas. A Fernando Barroso (Ferrol, 1979) parece non importarlle contradicir a tendencia: o seu novo traballo, Live at Silence Lovers Club, orbita en 12 pezas arredor da mandolina.
O poeta Antonio Gamoneda (Oviedo, 1931), unha das voces centrais da poesía española contemporánea, compartirá escenario con Dores Tembrás (Bergondo, 1979), autora de referencia entre as últimas promocións de poetas galegas. A sesión, o vindeiro 19 de febreiro na Coruña, será un dos pratos fortes do ciclo Poetas Di(n)versos, que dirixe a escritora Yolanda Castaño.
É practicamente a prehistoria do teatro moderno en Galiza. Os parrafeos, unha especie de diálogos por veces socráticos e con raíces populares, contribuíron á codificación dunha escena galega e en galego. Este sábado, na Casa Museo Manuel María de Outeiro de Rei, a compañía amadora da Sociedade Cultural Medúlio de Ferrol recupera un emblemático: Mal de moitos, de Euxenio Charlón e Manuel Sánchez.
Conversas de aperitivo e de sobremesa, regadas cunha botella de viño e cadanseu vaso de whisky, culminadas cun Montecristo, conforman a manda política e cultural de Francisco Fernández del Riego. Elaborounas o xornalista Perfecto Conde e publicaraas Xerais sete anos despois da morte do intelectual galeguista.
Aos 101 anos do seu falecemento, a Asociación Cultural O Galo de Compostela organiza unha homenaxe ao poeta Eduardo Pondal. Será esta sexta feira, ás 19.30 horas, no Museo das Peregrinacións. O profesor e escritor Carlos Callón disertará sobre o significado político e literario do autor do Himno Galego.
Veteranos de mil batallas de rock avanzado, músicos de probada prestancia e olfacto inquedo, Malraio é o tenso proxecto co que se presentarán, esta sexta feira na Gentalha do Pichel de Compostela, nomes coñecidos da escena da cidade. “Xuntámonos por necesidades de tipo psicolóxico”, explica divertido Roi Fernández, baixo e voz da banda, “era mellor un grupo que irmos a terapia”.
A pintura como medio de comunicación, axitación e propaganda. Expresión de estremecementos íntimos e colectivos. A súa función é tamén simbólica, emblemática. O rastro da destrución dun pobo. Todos eses elementos, e moitos outros, respiran en A derradeira lección do mestre, o óleo que Castelao pintou no exilio e que se exporá en Galiza por primeira vez a finais deste ano.
O 29 de setembro de 2015, a profesora da Universidade da Coruña Pilar García Negro defendeu no Parlamento galego unha Iniciativa Lexislativa Popular “en defensa do dereito ao coñecemento e á contemplación da obra de Castelao polo pobo galego”. O PP votou en contra. Máis dous anos despois, é a Xunta a que asume parcialmente o seu contido: no último trimestre do ano, a Cidade da Cultura acollerá a exposición de A derradeira lección do mestre.
A entidade é un dos núcleos da AJA-Portugal, cuxo obxectivo é divulgar o legado do cantautor, e ofrecerá unha batería de eventos no próximo sábado 27
O máis célebre dos óleos de Alfonso Daniel Rodríguez Castelao, A derradeira lección do mestre, podería visitar por primeira vez Galiza. Farao de prosperaren as negociacións da Xunta -“avanzadas”, segundo fontes coñecedoras- coa institución que acolle o cadro, o Centro Galiza de Bos Aires.
O vindeiro 11 de marzo a fadista Ana Moura actuará en Pontevedra. Será ás 20:00 horas no Pazo da Cultura. A artista, que ofrecerá tamén un concerto o día 10 en Ferrol, fai parada nas cidades galegas dentro da xira mundial do seu disco Moura.
O evento anual co que a ONG Implicadas no Desenvolvemento atinxiu o domingo a súa décimo terceira edición. A mestura e o cruzamento de artes, nun serán conducido pola poeta Yolanda Castaño e o actor Mon Santiso, volveron caracterizar o Implícate. Como cada ano desde 2006, o Teatro Principal de Santiago de Compostela acolleu, con boa entrada, as actuacións.
Algúns dos poemas máis célebres da literatura galega atópanse nun libro humilde, cuxa primeira edición facturou un fabricante de cartóns para confitarías. Os soños na gaiola, de Manuel María, non só achegou a lingua a centos de cativas e cativos. Tamén inventou un xénero para o galego: a poesía infantil. A fundación que custodia o legado do poeta vén de editar a obra na versión máis achegada a como a concibira por primeira vez hai medio século.
O ciclo de cinema itinerante Ficciónate chega á Mariña este sábado, 13 de xaneiro. A proxección será no Teatro de Ribadeo ás 20:00 horas e estará seguida dun coloquio en que participarán os distintos creadores das curtametraxes expostas.
