Santi Mina volve adestrar co Celta a un día de que se resolva o seu recurso contra a condena por abuso sexual

O dianteiro vigués Santi Mina, condenado a catro anos de prisión pola Audiencia Provincial de Almería por un delito de abuso sexual, comezou adestrar na mañá desta cuarta feira nas instalacións do Real Club Celta en Mos. Adestrou á marxe do grupo mais canda o porteiro Agustín Marchesín, que se recupera dunha lesión. O Tribunal Superior de Xustiza de Andalucía está pendente de resolver o recurso interposto polo futbolista contra a sentenza e agárdase que se pronuncie esta mesma quinta feira. O clube apartárao após ser condenado e o pasado curso xogou cedido no Al-Shabab árabe, mais hoxe citouno en Afouteza ás 10 horas para reincorporarse á disciplina celeste á espera de resolver o seu futuro.