Viaxe ás Indias

—Champiñóns recheos Os champiñóns recheos de xamón e allo son unha explosión de sabor. É un entrante sinxelo e rápido para unha comida ou perfecto para engadir a unha petiscada. Elaboración: Comezamos lavando os champiñóns, tirámoslles o pé e secámolos cun pano de papel. A continuación pelamos e cortamos o allo en dadiños moi pequenos e mesturámolo cos taquiños de xamón. Batemos un ovo e reservámolo. Enchemos os champiñóns coa mestura de xamón e allo e cando os teñamos todos botamos cunha culler pequena o ovo batido dentro de cada champiñón. Finalmente botamos o queixo relado por enriba e metemos no forno, que previamente quecemos a 200ºC, durante uns 10 minutos, máis ou menos. Podemos cociñalos na air fryer tamén. Servimos quentiños e con perixel fresco cortado por enriba. —Curry de lagostinos O curry de langostinos é un prato orixinario da cociña do sueste asiático, aromático e cheo de sabor. A base do curry adoita ser unha mestura de especias como cúrcuma, comiño, coandro, xenxibre e pementos, que se combinan con leite de coco para crear unha salsa cremosa e deliciosa. Elaboración: En primeiro lugar pelamos os allos e o xenxibre e esmagámolos nun morteiro cun chisco de auga. A continuación cortamos a cebola en xuliana e refogámola cun pouco de aceite, engadimos tamén o allo, o xenxibre, as follas de loureiro, o cravo e o cardamomo. Cando a cebola estea case lista, engadimos o tomate pelado e cortado en taquiños e cociñamos uns 10 minutos. Mentres se cociña a cebola tiramos a casca dos lagostinos e reservamos as cabezas. Con elas imos facer un caldo, para isto refogámolas cun chisco de aceite nun cazo e despois engadimos un pouco de auga. Deixamos cocer uns minutos e retiramos do lume. Despois de cociñar o tomate imos retirar o cravo, o cardamomo e o loureiro e engadir o iogur e tamén as especias en po: comiño, cúrcuma e pemento doce. Mesturamos ben e deixamos cociñar uns minutos. Máis tarde engadimos un pouco do caldo das cabezas pasado por un coador e trituramos todo co batedor. Co mollo case preparado incorporamos o leite de coco, remexendo ben para obter un mollo homoxéneo, e engadimos os lagostinos. Uns minutiños serán suficientes para que se cociñen. Servimos ben quente con perexil picado e sementes de chía por enriba, podemos acompañalo con arroz branco ou pan pita. —Boliños frescos de banana e coco Versionamos os boliños de banana tan típicos de América Latina e engadímoslles unha sopa de coco que ademais de refrescarnos fará que chupemos os dedos. Elaboración: Comezamos esmagando a banana cun garfo, a continuación engadimos pouco a pouco a fariña integrada co fermento en po mentres mesturamos ben; comezamos cunha culler e despois acabamos amasando coas mans. Cando teñamos a masa ben traballada, mollamos un pouco as mans en aceite e facemos boliñas. Pintámolas ben con aceite por toda a superficie e cociñámolas nunha frixideira de aire a 180ºC durante uns 15 minutos, dependendo do tamaño. Se non temos frixideira de aire podemos fritilas nunha tixola con aceite. Mentres se cociñan, preparamos a sopa na que as imos mollar, para isto mesturamos o coco e o leite a partes iguais, engadímoslle o azucre e o coco relado. Cando as boliñas estean douradas por todos os lados, retiramos e mergullámolas no leite de coco, deixamos na neveira un par de horas para que estean ben frías e servimos coa sopa.