A música en streaming, só para os éxitos

Dende este mes de abril, Spotify, a principal plataforma de música en streaming, con máis de 600 millóns de usuarios, xa non paga nada aos artistas polas reproducións da maior parte das cancións que ofrece. Este cambio trátase probablemente da maior revisión do seu modelo económico respecto aos dereitos de autor ao introducir un límite de 1.000 reproducións para que as pistas podan recibir ingresos polas escoitas recibidas na plataforma. Un punto de inflexión que causou xa unha enorme preocupación entre os artistas emerxentes pero que tamén abre moitas preguntas para os propios usuarios da plataforma que pagan mensualmente unha subscrición "premium" para escoitar música en Spotify sen anuncios. Novo modelo de negocio Nestas mesmas páxinas xa repasamos a precariedade do modelo de negocio que ofrece a música dixital, mediante o que Spotify pagaba 0,0028 euros por cada reprodución. Isto significa que para gañar un euro eran precisas 360 escoitas, pero agora para poder percibir esta cantidade é necesario triplicar esta cifra por cada canción, sempre e cando os usuarios escoitasen máis de 30 segundos de cada peza, porque se non, non se contabilizarán. Un sistema inviable para os artistas emerxentes que agora empeora aínda máis e evidencia que os ingresos récord da industria non chegan aos músicos independentes ou de pequenas discográficas, como a gran maioría do panorama musical galego. Spotify argumentou que tomou esta decisión ante o crecente aumento de cancións sen reproducións na súa plataforma, pistas que están dispoñibles supoñendo un custo de almacenamento para os servidores pero que non reverten en ingresos. Dende o seu comezo, os servizos de música en streaming ofertaron como grande atractivo poder acceder a toda a música do mundo en calquera momento de forma legal a través dun modelo de subscricións por prezos mensuais que apenas supoñían o custo de mercar un único disco. A día de hoxe o catálogo de Spotify, en constante crecemento, conta xa cuns 35 millóns de cancións, das cales a compañía estima que preto de 83% recibiron menos dun millar de reproducións no último ano, e preto de 25% non foron escoitadas ningunha vez en doce meses. Este modelo está a supoñer un problema financeiro para Spotify, que con esta drástica decisión fai evidente que os custos mínimos para manter a infraestrutura que fai posible acceder a "todas as cancións do mundo en calquera momento" son cada vez máis elevados. Con todo, ante esta situación había cabida para diferentes respostas empresariais e Spotify optou por unha que considera gran parte do seu catálogo musical como spam. Se ben a música resulta cada vez máis barata de producir, e demostrouse en múltiples ocasións que cancións creadas por intelixencia artificial proliferan nas plataformas, tamén é evidente que dentro de 83% das cancións de Spotify que non alcanzaron a barreira das 1.000 reproducións hai milleiros de artistas lexítimos. Só éxitos Acadar este límite mensual non resulta imposible, de feito hai xa un número relevante de artistas que fan música en galego que superan os centos de miles de reproducións e, nalgúns casos, mesmo o millón. Con todo, os números que aparecen recollidos nos perfís de cada grupo en Spotify son dende a publicación inicial de cada peza, en ocasións anos atrás, polo que se ben nun momento poderían ter acadado un éxito importante, en canto pasa o tempo, de non acadar as 1.000 reproducións mensuais deixarían de xerar ingresos. A situación é aínda máis complexa para os músicos emerxentes e os seus primeiros lanzamentos, cando máis complexo resulta alcanzar unha audiencia capaz de impulsar estas cifras, xa que non atoparán ningunha diferenza entre publicar a súa música en Spotify ou directamente regalar a súa descarga nas redes. Spotify só retribúe o éxito de agora, as cancións que son capaces de reunir unha audiencia relevante cada mes, independentemente de éxitos pasados. Pero estes cambios tamén impactan nos propios usuarios. O streaming presentouse como unha alternativa accesible e útil que ofrecía as vantaxes da nova era da música dixital a todos os públicos de forma legal e retribuíndo aos artistas. As campañas contra a piratería en internet sempre se presentaron como un roubo aos músicos, lideradas no Estado pola SGAE, que criticou duramente estas prácticas. Con todo, agora os usuarios de Spotify poden atoparse ante unha situación na que, pagando a súa subscrición mensual, os autores das cancións que escoitan non perciban nada, co que cabe preguntarse máis que nunca a onde están indo estes cartos.