Os Feroz aterran en Pontevedra durante dous anos: todo sobre a chegada dos premios

Os Premios Feroz celebraranse en Pontevedra en 2025 e 2026, despois do acordo alcanzado entre a Asociación de Informadores Cinematográficos de España (AICE) e o Concello. O anuncio realizárono na mañá desta cuarta feira, 8 de maio, a presidenta da AICE, María Guerra, e o rexedor da cidade, Miguel Anxo Fernández Lores. "Hoxe é un gran día para Pontevedra e para a Galiza", destacou Fernández Lores, nunha rolda de prensa convocada na terraza do Pazo da Cultura, incidindo en que a cidade "será vangarda e será epicentro da cultura e do talento" dun sector audiovisual que é un "motor de enorme relevancia". Segundo Fernández Lores, os Premios Feroz "encaixan en Pontevedra á perfección" e permitirán unir turismo, cultura e economía, contribuíndo a desestacionalizar o turismo e proxectando unha "visión compartida" que irá máis aló dos premios, xa que ademais da celebración da propia gala de entrega, os Feroz organizarán unha ampla programación de charlas, coloquios, obradoiros, clases maxistrais e outras actividades que se desenvolverán nos meses previos á gala e que se irán anunciando nos próximos meses. O Play-Doc de Tui, vinte anos exercendo de porta aberta á realidade Unha gala con máis de mil persoas asistentes Lores quixo lembrar a “tradición cinematográfica” dunha cidade cunha “presenza de produtoras que triunfan, o Festival Novos Cinemas, o Culturgal, ou a propia Facultade de Ciencias Sociais, onde se imparte o Grao de Audiovisual”. A cerimonia de entrega dos premios acollerá unhas mil persoas, que se reunirán no Pazo de Congresos de Pontevedra para descubrir as gañadoras das 21 categorías -ademais do Feroz de Honor-, nun formato de cea de gala. Fernández Lores, insistiu en que a celebración dos Feroz supera os límites do local, e desvelou que está en conversas con outras administracións, especialmente cos concellos limítrofes, para facerse cargo da infraestrutura que precisa un evento desta natureza. “As negociacións van por un camiño moi satisfactorio”, asegurou o rexedor. María Guerra foi a encargada de anunciar que a gala de entrega de premios decorrerá o sábado 25 de xaneiro no recinto feiral. A presidenta da Asociación de Informadores Cinematográficos de España detallou que unha das razóns para a elección de Pontevedra viu dada polas grandes posibilidades do recinto feiral. A xornalista quixo encomiar a “condición de cidade culta e complexa, aberta ás voces do audiovisual” de Pontevedra e incidiu na importancia que tiña para os premios Feroz desembarcar na Galiza pola súa “potentísima industria audiovisual”, polo auxe do país como escenario de producións e pola cantidade de creadoras galegas, realizadoras dun “cine de autor que está en todas partes”, que están obtendo grandes triunfos internacionais, desde Lois Patiño e Oliver Laxe até Jaione Camborda. Nese sentido, explicou, os premios Arrebato, dedicados á produción audiovisual máis experimental e arriscada, atopan na Galiza o seu lugar idóneo. Segundo María Guerra, a chegada dos premios á cidade permite estabelecer un diálogo entre as persoas creadoras e a sociedade, para debater sobre os problemas que afectan a toda a cidadanía. Nese sentido, tamén apelou á ampla programación cultural na que público, prensa e industria poderán atopar un punto de encontro e adiantou que o anuncio dos nomeamentos para as 21 categorías terán lugar en Pontevedra a finais de ano, probabelmente no mes de novembro. “Os Feroz son uns premios con vocación itinerante, irreverente e rompedora, que se ofrecen en cada edición como punto de encontro para celebrar os logros artísticos, mais tamén un espazo de reflexión coa sociedade mesma", declarou. A MICE busca no cinema o rastro da construción da democracia desde a mirada feminina: as chaves da 19ª edición "Globos de Ouro" Os Premios Feroz son uns galardóns que entrega anualmente a Asociación de Informadores Cinematográficos de España desde 2014 para destacar o mellor da produción audiovisual no Estado do ano, tanto en cinema como en televisión. Inicialmente naceron como premios estritamente cinematográficos, mais desde a IV edición os galardóns abríronse tamén ao sector televisivo, o que acabou valéndolles o alcume de “os Globos de Ouro españois”, por actuar como antesala dos Premios Goya. Esta será a quinta vez que os Premios Feroz se celebren fóra de Madrid despois das edicións en Bilbao (2019), Alcobendas (2020) e Zaragoza (2022 y 2023). AICE acolle un grupo de máis de 250 xornalistas e críticos dedicados a informar sobre cinema en televisión, radio, prensa e Internet de todo o Estado. 'As Neves' preestreouse na Fonsagrada