O acordo comercial entre Mercosur e a UE fica no ar a raíz das tensións entre o Brasil e Francia

A presidenta da Comisión Europea, Ursula von der Leyen, reuniuse esta sexta feira co mandatario de México, Andrés Manuel López Obrador, no fechamento da súa xira por América Latina. Mercosur reclama cambios á UE para ratificar o pacto comercial O principal obxectivo desta xira da representante de Bruxelas foi intentar avanzar no estabelecemento dun tratado de cooperación comercial entre a Unión Europea (UE) e o bloque dos Estados de Mercosur (conformado pola Arxentina, o Brasil, o Uruguai e o Paraguai). O acordo comercial é visto con preocupación por parte dos sectores produtivos da Galiza, especialmente entre amplas capas do sector primario, xa que permitiría a entrada de mercadorías con facilidade para competir coas galegas con prezos á baixa. Os Estados de Mercosur son importantes produtores de polo, carne de vacún, mel, viño e froitas. Todas elas mercadorías de relevancia para a economía da Galiza, que se vería afectada por un marco arancelario e de normativa para a entrada de produtos máis laxo no seo da UE. Para intentar salvar as trabas que Francia pon ao acordo, a UE anunciou que estabelecerá un protocolo adicional que prevé sancións en caso de incumprimento de obrigacións ambientais, algo que non gustou ao presidente brasileiro, Lula da Silva. "A premisa que ten que existir entre socios estratéxicos é a de confianza mutua e non a de desconfianza e sancións", criticou. As achegas millonarias anunciadas por von der Leyen non cambiaron a postura de Lula sobre o acordo da UE con Mercosur. Bruxelas quere inxectar 10.000 millóns de euros en América latina Von der Leyen anunciou na xira unha inxección en América Latina de até 10.000 millóns de euros no marco de Global Gateway, unha estratexia coa que a UE busca mobilizar investimentos para infraestruturas públicas e privadas en todo o mundo. A nivel xeopolítico, esta iniciativa é vista como unha resposta á Nova Ruta da Seda impulsada pola China. En contraposición, a UE busca estimular o fluxo do comercio e dos investimentos cos Estados de América latina, xa que aínda que nun primeiro momento Beijing centrouse en Asia Central, despois tamén expandiu a súa iniciativa a África, Asia, Oriente Medio, Europa, Oceanía e América Latina. Na mesma liña que Lula falou o mandatario da Arxentina, Alberto Fernández, que aínda que expresou o seu desexo de que o acordo saia adiante, tamén deixou claro que debe ser "equilibrado" e que non debe beneficiar unicamente a unha das partes. Interese da UE no litio A UE carece de minerais estratéxicos e esenciais para desenvolver a súa transición enerxética, entre eles o litio, considerado vital para reducir o quecemento global. Por iso, von der Leyen visitou Arxentina e Chile, dous dos tres Estados, xunto a Bolivia, do chamando Triángulo do litio, que alberga 65% das reservas mundiais do mineral, e nos que Bruxelas ten especiais intereses. Chile segue México e busca nacionalizar o litio Na Arxentina, onde a UE ten 40% do investimento estranxeiro, von der Leyen fechou con Fernández un acordo de entendemento, mediante o cal a UE involucrarase en agregar valor á produción de litio. "Vostedes vanse a converter nun centro rexional de enerxía renovábel co apoio de Global Gateway", dixo a presidenta da Comisión Europea, que recoñeceu o interese da UE porque "necesita un provedor de enerxía limpa fiábel". En Chile, a representante de Bruxelas reuniuse co mandatario, Gabriel Boric, que en abril lanzou unha política estatal do litio co obxectivo de converter o Estado suramericano no primeiro produtor mundial de litio. Durante a reunión, asinaron dúas accións de cooperación para o desenvolvemento da industria do hidróxeno renovábel cun investimento total superior aos 220 millóns de euros. Francia segue reticente O ministro francés de Comercio Exterior, Olivier Becht, afirmou esta sexta feira que o acordo entre a UE e Mercosur leva negociándose 23 anos e que a próxima Presidencia do Estado español do Consello da UE (que terá lugar durante o segundo semestre de 2023) non ten que ser "si ou si" o momento de chegar a un acordo, xa que se corre o "risco" de aprobar algo que "non satisfaga a ningunha das partes". O ministro francés aclarou que "París non é proteccionista", e que só pide que o acordo con Mercosur respecte as condicións ambientais, sanitarias e laborais exixidas ao resto de Estados da UE para non xerar un dumping que faga que os produtos da UE deixen de ser competitivos. A UE busca en Mercosur un socio para reducir a súa dependencia dos EUA e da China Becht destacou que estes "debates" non só afectan a Mercosur, xa que tamén se están tendo conversas "complicadas" coa India, por exemplo, polo que asegurou que "non é unha cuestión estigmatizante", senón que se necesita "máis tempo para chegar a un acordo equilibrado". A Asemblea de Francia votou en contra do acordo UE-Mercosur A Asemblea Nacional francesa votou esta semana en contra de que se aprobe o acordo entre a UE e Mercosur nas condicións actuais, con 281 votos en contra do pacto fronte a 51 a favor. Sobre as cuestións ambientais e do Amazonas e o rexeitamento do Brasil ao estabelecemento de posíbeis sancións no caso de incumprimento do potencial acordo comercial entre Mercosur e a UE, Becht respondeu ao mandatario brasileiro afirmando que "a confianza non exime do control" e que un punto importante dentro do acordo debe ser cales serán as sancións que se aplicarán no caso de que algunhas das partes non cumpran co estipulado. "Non sei se os Estados de Mercosur van aceptar as condicións da UE e que van pedir a cambio", concluíu o representante do Executivo francés. A UE e México buscan aumentar a súa relación comercial antes de fin do ano Ursula von der Leyen, presidenta da Comisión Europea, e Andrés Manuel López Obrador, presidente mexicano, coincidiron esta sexta feira na importancia do acordo comercial entre a Unión Europea (UE) e México e acordaron acelerar as negociacións con vistas a que sexa actualizado antes de final de ano. Un dos temas abordados foi o potencial de México como hub enerxético, industrial e loxístico estratéxico que podería abastecer o mercado da UE, cun alto potencial en enerxía de hidróxeno verde. México e Bruxelas expresaron o seu desexo de desenvolver unha asociación política e comercial "máis profunda", mostrándose "comprometidos" a impulsar aínda máis a súa estreita cooperación a nivel bilateral, rexional e mundial. "México é un socio estratéxico e un membro chave do G20 [foro internacional de gobernantes e presidentes de bancos centrais para a promoción da estabilidade financeira internacional] co que compartimos valores fundamentais", afirmou von der Leyen, que tamén manifestou a súa intención de fortalecer os lazos económicos entre o Estado norteamericano e o bloque comunitario, así como de profundar a cooperación en cuestións estratéxicas como a transición enerxética e dixital e nos temas migratorios e de saúde. Pola súa parte, López Obrador deu a coñecer que se lograron avances nalgúns acordos de cooperación económica. "Convimos en apresurar a sinatura do Tratado de Libre Comercio entre o noso país e a UE", comentou o presidente mexicano ao rematar a reunión, sen dar máis datos sobre os detalles concretos.