Que solucións teñen os viños da Ribeira Sacra para combater o menor consumo de tintos no mercado?

A incerteza instalouse no sector viticultor da Ribeira Sacra. Tras unha das tres mellores colleitas dos últimos anos, cun total de 6,6 millóns de quilos de uva na colleita, a baixada do consumo dos tintos e o excedente acumulado nas adegas preocupa de cara á vindeira tempada, a cal chegará en pouco máis de seis meses. Esta terza feira, Unións Agrarias (UUAA) denunciou desde Monforte (Terra de Lemos) esta situación e demandou “medidas urxentes” á Xunta da Galiza, entre elas unha “destilación de crise”. Esta acción permite ás produtoras e aos produtores retirar do mercado unha cantidade determinada co obxectivo de equilibrar a oferta e a demanda. O produto retirado destílase para obter alcol etílico para fins industriais ou enerxéticos. O secretario da sectorial vitivinícola de UUAA, Carlos Basalo, daba algunhas pistas sobre este cambio no consumo do viño. “O motivo pode vir desde o cambio climático e o aumento de consumo de viños frescos, polo que se accede antes aos brancos, até o aumento de prezos da lista da compra, onde o viño non é un artigo de primeira necesidade”. Ante esta situación cargou contra a Administración galega asegurando que “en 2023 houbo promesas por parte da Xunta da Galiza e seguimos sen elas, noutras comunidades autónomas tomáronse medidas como a destilación de crise ou mesmo poda en verde, como na Rioxa, onde solicitaron facela en 6.000 hectáreas, mentres aquí Medio Rural mira para outro lado”. Máis promoción Desde a Asociación Galega de Viticultura (AGV), o seu presidente, Roberto Rivas, engade outros factores que aumentan a problemática. En declaracións a Nós Diario afirma que os caldos galegos teñen que loitar contra a competencia dos “grandes 'transatlánticos' do tinto, como Rioxa ou Ribera del Duero, que castigan a Ribeira Sacra”. Entende que para saír deste “mal momento” que está a pasar esta Denominación de Orixe (DO) son necesarias “campañas agresivas” que mostren que non se trata "só do seu consumo dunha bebida, senón de apoiar e defender unha paisaxe e unha maneira de vida”. Ademais, Rivas salienta a importancia da “recuperación da mesa do viño e de empregar contratos homologados con prezo a varios anos, que é o que nos mantén”. A Feira do Viño de Vilachá pon en valor a viticultura tradicional do Brollón Basalo, pola súa parte, interpreta que “debería facerse un plan de actuacións da man de viticultores, adegas e Consello Regulador en relación á promoción en terceiros países. Falamos de exportación, e hai axudas de Europa para isto”. As campañas internacionais, para UUAA, son "fundamentais". "Hai que ter en conta que 93% do viño Ribeira Sacra véndese no mercado estatal e non hai case exportación". "Culpa" da pandemia En declaracións a Nós Diario, o presidente do Consello Regulador da DO Ribeira Sacra, Antonio Lombardía, é máis optimista. Considera, iso si, que a situación que viven os viños tintos a nivel de consumo é “global” e a DO “non é allea ao mercado”. Indica que, con todo, as vendas “mantéñense, baixando 5% o ano pasado”. Para o responsábel do Consello Regulador, marcou “moito” a pandemia da Covid-19 que comezou en 2020. “Foi un punto de inflexión que aumentou o exceso de viños nas adegas que rematou en excedentes”. Desde o seu posto de responsabilidade Lombardía defende a actuación das adegas que, explica, “mantiveron o seu compromiso estes anos, mesmo na pandemia, de coller toda a uva aos viticultores”. Pola contra, UUAA cre que os números non son optimistas. “Tivemos tres colleitas de máis de 6 millóns de quilos, algo máis de 4,5 millóns de litros, con vendas ao redor de 3,5 millóns de litros polo que non sae todo o viño que entra nas adegas”, indica Basalo. A DO Ribeira Sacra fecha unha das colleitas máis produtivas e eleva a 76,8 millóns os quilos de uva recollidos no país Introdución de brancos Segundo os datos facilitados pola DO Ribeira Sacra, na colleita de 2023, despois da mencía, a variedade máis produtiva foi a branca do godello con 699.031 quilos, e a terceira, a de albariño, con 97.560 quilos. “As adegas están adaptándose á circunstancia de que hai máis demanda de brancos”, admite Antonio Lombardía, “e nós apoiamos desde a DO a reestruturación con enxertos de novas variedades, mais non supoñen un cambio significativo na idiosincrasia da Ribeira Sacra, seguimos sendo de tintos”, engade o presidente da DO. Para Roberto Rivas “a introdución de brancos, como é o caso de godellos, danme moito medo”. Asegura que coidar unha cepa “leva moitos anos e debería de darse un debate en serio sobre as súas consecuencias”. É un tema que se está a constatar na zona vinícola e do que ten constancia a técnica en elaboración de viños Maira Ratón. "Non sei se é unha moda mais cada vez introdúcese máis, non só con enxertos, tamén con plantacións enteiras de viño branco", asegura a Nós Diario. Malia seren, polo de agora "cantidades pequenas", esta experta vitivinícola recoñece que "desconcerta o seu aumento". Todo sobre a Feira do Viño de Amandi: bo viño e música no corazón da Ribeira Sacra A Xunta da Galiza evita falar de axudas específicas A situación da Ribeira Sacra en relación ao viño chegou tamén esta terza feira ao Parlamento galego da man do PSdeG. O director da Axencia Galega da Calidade Alimentaria, José Luís Cabarcos, defendía a actuación da Xunta da Galiza en relación ás axudas ao sector, asegurando que o Goberno galego “non pode acceder ás medidas doutros territorios como Canarias ou Açores”. Na Comisión de Agricultura, sinalou ao Goberno español como “responsábel” de que moitas das medidas non se puideran activar no caso galego. Ademais, apuntou á pandemia da Covid-19 como unha das circunstancias, xunto coa baixa demanda de tintos, "para que se dea esta situación" na DO. Viñedos singulares Desde o PSdeG, a deputada Lara Méndez afeoulle a Cabarcos que "fale só de axudas xerais e non das específicas para a Ribeira Sacra", unha zona que, "a pesar da súa grande importancia, non dispón delas para a súa viticultura", como si teñen viñedos singulares do Estado español "como Canarias, que achega entre 2.310 e 2.530 euros, ou mesmo fóra do Estado español, como na rexión italiana de Aosta ou no arquipélago das Açores". Por último, Méndez reclamou ter en conta "a maior dificultade que existe nesta viticultura heroica no seu custo de produción".