O sector da produción de enerxía eólica é o que menos emprego xera na Galiza

A produción eólica de enerxía eléctrica é o sector económico que menos emprego produce entre os 58 estudados polo Informe Ardán Galiza 2023, que analiza a situación económica e competitiva do país. O documento estuda os 58 sectores máis relevantes da economía galega, que acumularon 75% da riqueza xerada na Galiza e aglutinaron 76% do total dos ingresos obtidos no ano 2021. Estes 58 principais sectores da economía galega estaban compostos por un total de 17.704 empresas, 52% do total (33.925 firmas). Desta forma, as 54 compañías que se dedicaban á xeración eólica de enerxía eléctrica tan só xeraron 0,01% dos empregos, a pesar de que o sector ocupaba o vixésimo lugar na clasificación entre os que maior Valor Engadido Bruto (VEB) achegaron á economía do país. Sanmartín denuncia o espolio eólico da Galiza na recepción dos membros do Ecofin Un dato, o da xeración de tan só 0,01% dos empregos por parte da xeración eólica de enerxía eléctrica, que contrasta co feito de ser un sector cuxo peso na actividade da economía galega aglutinou 0,16% das empresas e 0,32% dos ingresos xerados. Tendo en conta que a Galiza fechou 2021 cun total 1.032.784 persoas afiliadas á Seguridade Social, estímase que a cantidade de empregadas no sector da xeración eólica de enerxía eléctrica rondou o centenar (unhas 103 segundo o cálculo estimado). A baixa contratación na xeración eólica de enerxía eléctrica converteu o sector no que tivo un maior VEB por persoa traballadora. Así, este tipo de produción alcanzou en 2021 un Valor Engadido Bruto de 654.462 euros por cada asalariado ou asalariada, unha cifra 983% maior á do próximo sector cun maior VEB por traballadora ou traballador, o da produción de aluminio, con 60.430 euros de Valor Engadido Bruto por persoa traballadora na anualidade. Ademais, os gastos de persoal por cada empregada ou empregado no sector da produción eólica, de 45.566 euros por cada un, foron os maiores entre o conxunto dos sectores da economía estudados, por diante das actividades anexas ao transporte marítimo (de 45.451 euros) e da extracción pesqueira (de 43.336 euros). Por outra parte, un dos factores que destacou no sector da xeración eólica de enerxía eléctrica foi o baixo índice de inclusión de xénero. Para a súa análise, o informe empregou a mediana (o valor que ocupa o lugar central de todos os datos cando estes están ordenados de menor a maior) "xa que é un dato estatístico máis robusto porque, aínda que os extremos se vexan alterados, a mediana permanece invariábel". Tendo isto en conta, a mediana de inclusión da muller nas firmas do sector foi de 0%, unha variábel estatística que alcanzou 25% para o conxunto das empresas dos diversos sectores. Os ingresos de explotación do sector alcanzaron 341,16 millóns de euros (0,32% do conxunto da economía) e o VEB chegou a 243,87 millóns (0,23% do total). En termos de rendibilidade económica, a das empresas do sector na Galiza foi de 15,02%, mentres que o das empresas de capital galego ficou en 3,88%. No caso da rendibilidade financeira, o conxunto das firmas de produción eólica obtiveron un índice de 21,59%, que no caso das compañías galegas ficou en 7,72%. A variación dos ingresos da explotación eólica na Galiza aumentou 38,93% en 2021, despois dunha caída de 18,68% en 2020. No caso do VEB, incrementouse en 87,79% no último ano estudado polo informe (2021), tras caer 15,49% no exercicio anterior. Outros tipos de enerxía O seguinte sector na clasificación dos que menos postos de traballo xeraron segundo este informe pertenceu tamén ao da produción eléctrica. Foi o da xeración de enerxía eléctrica térmica e doutros tipos (excluíndo a xeración eólica), con 0,03% dos postos de traballo, a pesar de que tivo un peso na actividade económica galega que aglutinou 0,53% das empresas (un total de 181 firmas) e 0,36% dos ingresos de explotación (con 378,44 millóns de euros). Traballadores das Pontes ven "prematura" a confirmación do feche da central térmica Tendo en conta que a economía galega fechou 2021 cun total de 1.032.784 persoas afiliadas á Seguridade Social, estímase que a cantidade de persoas empregadas no sector da xeración de enerxía eléctrica térmica e doutros tipos rondou as 300 (unhas 310 segundo o cálculo). Na clasificación por sectores con maior Valor Engadido Bruto, a produción de enerxía térmica e doutros tipos ocupou a trixésimo terceira posición, con 0,16% do VEB total da economía galega, alcanzando o sector un total de 173,37 millóns de euros. En termos de rendibilidade económica, as empresas deste sector obtiveron un índice de 7,27%, por encima do obtido por aquelas que son galegas, que ficou en 3,88%. No caso da rendibilidade financeira, chegou en 2021 até 15,7% para as empresas do sector, ficando en 7,72% no caso das de capital galego. A variación dos ingresos de explotación da actividade na Galiza das empresas de xeración de enerxía eléctrica térmica e doutros tipos en 2021 foi de 14,69%, despois dunha caída de 3,85% en 2020. Pola súa parte, a variación do VEB alcanzou 17,81% na anualidade estudada (2021), despois dun descenso de 4,93% no exercicio anterior. O téxtil afianza a súa posición como sector máis dinámico O sector téxtil afianzou en 2021, segundo o Informe Ardán Galiza 2023, a súa posición como o máis dinámico segundo a definición do estudo, que considera que teñen maior dinamismo "aqueles con maior taxa de crecemento do seu Valor Engadido Bruto (VEB)" entre os anos 2020 e 2021. A mocidade, a favor de que o téxtil galego comunique na lingua propia Desta forma, o sector almacenista do téxtil e das pezas de vestir mantívose como primeiro da clasificación, cun VEB de 2.136,91 millóns de euros. Pola súa parte, o sector polo miúdo das pezas de vestir e os complementos pasou da terceira (en 2020) á segunda posición, cun VEB de 1.494,88 millóns. Predominio das pequenas empresas Tanto o sector almacenista do téxtil e das pezas de vestir como o sector polo miúdo das pezas de vestir e dos complementos, primeiro e segundo na clasificación dos máis dinámicos do informe, son segmentos con predominancia das pequenas empresas. A venda de roupa e complementos xerou 6,61% dos empregos no país No caso do sector almacenista, a taxa de compañías de menor tamaño alcanzou 96,46%, mentres que no sector polo miúdo chegou a 97,36%. Ademais, este segundo sector, o da venda ao público de roupa e complementos, xerou en 2021 até 6,61% dos empregos do conxunto do mercado laboral galego.