Multiplícanse os fenómenos meteorolóxicos extremos tras o verán máis cálido rexistrado

Na mañá da cuarta feira, en localidades gregas como Karditsa, Fthiotida, Corinthia, Argolis ou Evia, que se estenden desde o centro do país até a península do Peloponeso, a poboación espertou coa auga asolando as rúas e batendo nas súas vivendas após desbordarse os ríos, que colapsaron pontes, estradas e edificios ao arrastrar coches e rochas no marco do paso polo país da tormenta Daniel, que provocou no mínimo 14 mortes no territorio de Grecia, Bulgaria e Turquía. A quinta feira está previsto que o temporal abandone estes países logo de dous días, no que o ministro de Crise Climática e Protección Civil grego, Vassilis Kikilias, describiu como o “fenómeno máis extremo en termos da cantidade máxima de chuvia nun período de 24 horas desde que comezaron os rexistros no país”. Tres persoas morreron en Grecia até o de agora, entrementres tres continúan desaparecidas. En Volos, unha cidade portuaria de case 140.000 habitantes que foi a que máis sufriu nas primeiras horas desde a chegada da tormenta, depositáronse nun día até 150 millóns de toneladas de auga e lama, explicou Efthymis Lekkas, docente de Xestión de Catástrofes Naturais na Universidade de Atenas. Isto xerou un corte masivo das subministracións de auga e electricidade, que o Concello trataba de restabelecer a cuarta feira cualificando o estado da urbe de “situación de guerra”, sinalou ao xornal Khatimerini. Ducias de persoas tiveron que ser rescatadas da auga incluso por medio de balsas. Amais de Volos, en múltiples lugares, como Atenas e Tesalónica, prohibiuse circular pola rúa a medida que chegaban as inundacións, e tamén foi suspendido o transporte público por estrada e ferroviario nas zonas afectadas. O Observatorio Nacional de Atenas divulgou que en Zagora, no centro do país, alcanzáronse 754 litros por metro cadrado de chuvia. O meteorólogo Panagiotis Giannopoulos detallou á emisora ERT que “a cantidade de auga caída en 24 horas é a mesma que a chuvia habitual durante todo o outono”. No que atinxe a Turquía, sete persoas perderon a vida, cinco delas ao inundarse de súpeto un cámping no noroeste do país, perto dos lindes con Bulgaria, arrasando coas instalacións, os equipos de salvamento intentaban atopar onte as dúas persoas desaparecidas, un esforzo que continuará “ininterrompidamente”, salientou Ali Yerlikaya, titular de Interior, que engadiu que 31 persoas resultaron feridas e oito están hospitalizadas. En Istambul, onde a Gobernación informou de que máis de 1.750 vivendas e locais comerciais ficaron afectadas polo aumento do nivel da auga, dúas persoas faleceron. Á vez, varias estacións de metro e un hospital tiveron que fechar en distritos nos que se detectou a caída de até 130 litros por metro cadrado. A entidade de xestión de emerxencias turca alertou de fortes ventos e raios ademais de inundacións repentinas. A pesar dos efectos catastróficos das chuvias, o responsábel do servizo de auga da cidade, Begüm Celikdelen, trasladou á axencia EFE que “a auga está a entrar nos encoros desde algúns ríos pequenos”, após a caída das reservas de auga doce por baixo de 30% da capacidade máxima antes do temporal. Xa en Bulgaria, a área máis afectada foi o sur da súa costa no Mar Negro. A terza feira foi recuperado na auga o corpo dun turista que estaba considerado como desaparecido, o que incrementa a catro o número de decesos rexistrados no país pola tormenta. Dúas persoas máis están desaparecidas. Varias pontes quedaron destruídas ao desbordarse as bacías fluviais, que arrastraron os vehículos ao seu paso até o mar na cidade turística de Tsarevo, recolle a axencia AP, na que foi declarado o estado de emerxencia. O seu alcalde, Georgi Lapchev, alertou de que o reconto final de vítimas mortais pode ser máis alto ao descoñecerse o número exacto de persoas desaparecidas. “Ninguén viu xamais esta cantidade de precipitacións nesta zona”. O primeiro ministro búlgaro, Nikolai Denkov, fixo fincapé en que se tratou dun “desastre natural” e insistiu en que a caída de 300 litros por metro cadrado rexistrada na zona é algo que acontece moi raramente. Nese sentido, a canle Al Jazeera detalla que aínda que as inundacións na costa do Mar Negro son “algo pouco común”, no caso búlgaro son cada vez máis habituais por mor do “cambio climático e do deficiente mantemento das infraestruturas”. A fin dos veráns “sen preocupación” en Grecia Tamén se referiu ao cambio climático Kyriakos Mitsotakis, primeiro ministro grego, que subliñou que “temo que os veráns sen preocupacións, tal e como os coñecíamos, deixarán de existir e a partir de agora os próximos veráns probabelmente sexan aínda máis difíciles”. Ao longo do período estival, o país foi o epicentro de varios incendios forestais que se replicaron por toda a contorna do mar Mediterráneo. Porén, cando a situación semellaba controlada desatouse un novo lume no nordés, nas proximidades da fronteira con Turquía, a mediados de agosto. O fogo forestal, que foi controlado nas últimas xornadas, matou unha vintena de persoas -que se presupón migrantes- e devastou 90.000 hectáreas, converténdose no incendio máis grande na Unión Europea (UE) desde que comezaron os rexistros. En todo caso, estes fenómenos extremos non son exclusivos da rexión. A cuarta feira elevouse a 31 o número de mortes polo paso dun ciclón polo Estado brasileiro de Rio Grande do Sul, sinala o portal G1, no desastre natural con máis vítimas no territorio. Ademais, unha persoa faleceu no Estado de Santa Catarina. O estío boreal de 2023 foi a estación máis calorosa endexamais rexistrada A Organización Meteorolóxica Mundial confirmou a cuarta feira que o verán deste ano -no hemisferio norte- converteuse na estación coa temperatura máis alta desde que hai rexistros a nivel mundial hai máis de oito décadas. Após xullo, o mes máis cálido medido nunca, agosto alcanza a segunda praza. “Os tres meses que acabamos de ter son os máis cálidos en aproximadamente 120.000 anos, é dicir, na historia da humanidade”, remarca a subdirectora do Servizo de Cambio Climático da UE, Samantha Burgess. A temperatura media do planeta no verán boreal foi de 16,77ºC, por riba dos 16,48ºC de 2019, e en agosto ficou na contorna de 1,5ºC máis que na época preindustrial, o límite ao que desde 2015 tratan de evitar chegar os Estados do mundo, que pactaron ese limiar após as alarmas científicas sobre a intensificación dos efectos do quecemento global a partir deste punto. Unha vez feita pública esta información, o secretario xeral da Organización das Nacións Unidas, António Guterres, asegurou que “o colapso climático comezou”, e ratificou que “os científicos advertiron desde hai moito tempo do que desatará a nosa adicción aos combustíbeis fósiles”. En paralelo, laiouse de que o “noso clima está implosionando máis rápido do que podemos afrontar”. A Comisión Europea deixa claro que, ante o cambio climático, “prevense tormentas máis frecuentes e intensas, e veremos con menor periodicidade inundacións repentinas”. Asemade, indica que “aumentará a duración e gravidade das tempadas de fogos forestais”.