A xestión dos recursos naturais galegos, a reformulación do sistema de financiamento, a problemática da cobertura de postos de médico en sanidade durante a época estival ou a situación da AP-9 serán os principais temas sobre os que versará unha nova sesión do pleno do Parlamento da Galiza, que terá lugar os días 25 e 26 de xuño.
A orde do día para a última sesión do mes de xuño foi fixada na reunión da xunta de portavoces celebrada na mañá desta terza feira e da que se ausentou o deputado de Democracia Ourensá, Armando Oxea, integrado no grupo mixto.
Será un pleno ordinario no que se estreará como conselleira comparecente a responsable de Vivenda e Planificación de Infraestruturas, María Martínez Allegue. E farao antes despois do debate de dous textos lexislativos sobre un mesmo asunto: a xestión dos recursos naturais da Galiza.
Así, chega á Cámara a lei de recursos naturais aprobada polo Goberno galego de Alfonso Rueda semanas antes do final da pasada lexislatura e que inicia agora o seu camiño parlamentario co debate de dúas emendas de devolución presentadas por BNG e PSdeG.
Os nacionalistas tamén presentan a súa propia proposta lexislativa para xestionar os recursos naturais a través da creación dunha empresa pública, segundo avanzou a viceportavoz fparlamentari, Olalla Rodil, quen emprazou á celebración dunhas xornadas esta cuarta feira nas que os nacionalistas debullarán os detalles da súa proposición normativa.
Financiamento autonómico e sanidade son os temas elixidos polos portavoces da oposición para o seu enfrontamento quincenal co presidente galego, Alfonso Rueda, na sesión de control.
A nacionalista Ana Pontón cuestionará a Rueda sobre os pasos para reclamar un financiamento "máis xusto" para a Galiza, mentres que o socialista José Ramón Gómez Besteiro confrontará co popular sobre os problemas para a cobertura de postos no Servizo Galego de Saúde.
Unha semana despois da admisión a trámite no Congreso do cuarto intento lexislativo do Parlamento galego para lograr a transferencia da AP-9, a autoestrada volverá ter protagonismo nunha nova sesión do Lexislativo galego.
E farao por partido dobre, xa que o PP empregará unha das súas preguntas orais ao Goberno galego para coñecer sobre a súa opinión ante as "desconfianza" xerada, segundo o portavoz parlamentario popular, Alberto Pazos Couñago, tras as últimas manifestacións do ministro de Transportes, Óscar Puente, achega do custo dun hipotético rescate e traspaso para a súa xestión desde a Administración autonómica.
Pola súa parte, o BNG presenta unha proposición non de lei coa que queren solicitar o apoio do Pazo do Hórreo en aras de demandar a elaboración de informes que cuantifiquen, nun prazo máximo de tres meses, as cifras "reais" sobre o desembolso económico que suporía o rescate da Autoestrada do Atlántico.
Os socialistas tamén traerán ao debate parlamentario as peaxes que se pagan nas autoestradas galegas, no seu caso, para reclamar, a través doutra iniciativa de impulso, que a Xunta adopte nas autoestradas autonómicas as rebaixas aplicadas na AP-9 polo Goberno estatal, como sinalou a deputada do PSdeG Elena Espinosa.
Como sinalou Pazos Couñago, os puntos incluídos polo grupo maioritario no Pazo do Hórreo inclúen dúas proposicións non de lei coas que queren, por unha parte, reclamar que o Estado conte coa galiza e as comunidades na xestión directiva da Axencia Estatal de Supervisión da Intelixencia Artificial (AESIA) -que terá sede na Coruña- e, por outro, que a Xunta acorde con concellos e deputacións un plan para a apertura das instalacións deportivas á sociedade en xeral.
Por outra parte, cuestionará ao Executivo que sustenta coa súa maioría absoluta pola reforma do modelo de financiamento e as axudas concedidas aos deportistas galegos que participarán nos Xogos Olímpicos de París deste verán.
O BNG levará ao pleno unha moción coa que pretende demandar que se "desconxele" a comisión de estudo creada no Parlamento galego na última lexislatura sobre a reforma do modelo de financiamento autonómico, á vez que esixirá á Xunta que abra unha "negociación directa" co Goberno español que permita "defender os intereses do país".
As iniciativas do grupo frontista complétanse con varias puntos centrados na situación da sanidade, especialmente, co peche do centro de saúde de Doiras, no municipio de Cervantes.
Por último, os socialistas pedirán a través dunha proposición non de lei que a Xunta aumente o seu compromiso co impulso do deporte feminino, á vez que pedirá explicacións, vía pregunta urxente, sobre as medidas para a protección desde a Administración autonómica co colectivo LGTBI.
Así mesmo, como apuntou Espinosa, o terceiro grupo da Cámara tamén poñerá o foco na situación dos avogados da quenda de oficio e preguntará á Xunta como está o proceso de adquisión dos terreos do parque natural Fragas do Eume.
