O portavoz do PSdeG no Parlamento galego e aspirante á Secretaría Xeral do partido, Xosé Ramón Gómez Besteiro, manifestou o seu apoio ao presidente do Goberno español, Pedro Sánchez, tras o seu anuncio de que abre un período de reflexión sobre o seu futuro á fronte do Executivo estatal tras as investigacións á súa esposa, Begoña Gómez.
Nun vídeo difundido pola formación socialista, Besteiro manifesta "todo" o seu apoio a Sánchez, ao que traslada que sabe "perfectamente" en que situación se atopa, nunha alusión ás investigacións xudiciais contra el, finalmente arquivadas, que o levaron a abandonar a política temporalmente.
En política non todo vale, e sei ben do que falo, vivino en primeira persoa.
— Gómez Besteiro (@jrgomezbesteiro) April 24, 2024
Todo o meu apoio para ti e a túa familia, Presidente.
Abrazo enorme, amigo Pedro. https://t.co/wlSCzLeUij pic.twitter.com/oX8Q9o3A1f
"Sei perfectamente polo que estás a pasar. Esa impotencia polas calumnias da dereita, por unha campaña sucia que parece non ter fin. O prezo que pagas ti e o que paga a túa familia. Seino perfectamente", sinalou Besteiro, que este domingo será proclamado novo líder do PSdeG no Congreso Nacional Galego que decorrerá en Compostela.
Besteiro fecha o seu vídeo dando as grazas a Sánchez por "demostrar que na política non todo vale". "Tes todo o meu apoio, presidente", conclúe.