Pazo Baión, referente do enoturismo nas Rías Baixas

Pazo Baión eríxese como unha finca singular cunha situación única en pleno corazón do val do Salnés que foi adquirida pola adega Condes de Albarei no ano 2008. Esta propiedade alberga dentro dos seus muros un dos viñedos máis espectaculares do panorama vitivinícola mundial coas súas 22 hectáreas da variedade albariño, onde a media de idade supera xa os 45 anos. Historia As primeiras referencias de Pazo Baión datan do século XVI coa fundación do pazo por parte da familia nobre dos Sarmiento. Durante séculos, algunhas das liñaxes máis importantes da Galiza viviron nesta propiedade, tales como os Soutomaior, Figueroa ou Mariño. A comezos do século XX adquiriría Pazo Baión un adiñeirado emigrante retornado da Arxentina, Don Adolfo Fojo, que levaría a cabo a maior reforma da propiedade. Foi este indiano quen lle concedeu o aspecto actual ao pazo, coas dúas torres de corte vitoriano que non posuía na súa orixe; tamén mandou construír unha fermosa adega de pedra que hoxe en día se atopa somerxida entre o mar de viñedos da finca. Pero a súa obra mestra foi a construción dunha impresionante vacaría que constitúe o maior edificio de Pazo Baión. Na década dos anos 70 levaríase a cabo a primeira plantación técnica de viño albariño na propiedade, converténdose en todo un referente para as Rías Baixas. Cabe sinalar que Pazo Baión goza dunha longa tradición vitivinícola, pois a través das escrituras atopadas consta que hai viñedo na finca desde o ano 1650. Unha nova etapa: Condes de Albarei Foi en 2008 cando a Adega Condes de Albarei adquiriu Pazo Baión. Arrancaba nese intre a etapa de maior esplendor da propiedade. Unha etapa que está caracterizada polo ambicioso proxecto co que chegaron os seus novos donos e que se sustenta, principalmente, en tres piares: —A elaboración de albariños de extraordinaria calidade a partir dun concepto de viño de pago ou finca. —A creación dun centro de enoturismo de referencia a nivel estatal. —E o impulso a un ambicioso programa social. A proposta enolóxica de Pazo Baión baséase na obtención dunha uva de calidade empregando as técnicas máis respectuosas co noso medio coa fin de obter uns viños situados na máis alta gama dos brancos estatais. A súa filosofía de traballo e coidado dos seus viñedos está baseada nun profundo respecto pola natureza, xa que é esta a que lle permite poñer o selo de singularidade aos seus viños, resaltando o terroir ou terruño único que define a esta propiedade. As excepcionais condicións dos solos graníticos, a elevada idade das cepas e as diferentes orientacións dos viñedos, aportan aos viños de Pazo Baión unha gran tipicidade e complexidade sensorial. Os tres viños que se elaboran na actualidade -Pazo Baión, Pazo Baión "Vides de Fontán" e Pazo Baión "Gran a Gran"- caracterízanse por empregar exclusivamente a uva da propiedade así como polo seu complexo método de elaboración onde se pretende resaltar o gran potencial da variedade albariño. Ese traballo levado a cabo desde o viñedo até a adega, vese recompensado cos numerosos premios e distincións que colleitan os seus viños. Un dos últimos foi o nomeamento do albariño Pazo Baión como “Mellor Viño Branco Español” pola prestixiosa guía de viños Gourmets. Enoturismo Até Pazo Baión achéganse cada ano miles de visitantes que queren desfrutar dunha xornada de enoturismo única nas Rías Baixas. Historia, natureza, arquitectura e viño conflúen nunha perfecta harmonía dando como resultado un microuniverso singular en pleno corazón do val do Salnés. Os amantes do viño chegan á propiedade en busca dunha experiencia diferenciadora e, desde a adega, traballan ano a ano para ofrecer una xornada enoturística que resalte o gran potencial que encerra Pazo Baión dentro de si. Paseos polos viñedos, catas maridaxe, concertos ao solpor.... Pazo Baión converteuse en todo un referente do enoturismo no Estado. O espectacular entorno natural da propiedade así como o seu programa de actividades levou a adega a ser galardoada co premio ao “Mellor Recuncho e Espazo Enoturístico de España” nos III Premios Rutas del Vino de España, máximo representante do enoturismo. Pero tamén son moitas as persoas que se achegan até Pazo Baión para desfrutar da espectacular reforma arquitectónica levada a cabo na propiedade polo prestixioso arquitecto galego César Portela. Nesta reforma conserváronse todos os valores existentes de tipo histórico, ambiental, botánico e paisaxístico. Tamén se recuperaron ou rehabilitaron aqueles existentes noutros tempos e engadíronse novos valores conseguindo unha total harmonía. Por outro lado, Pazo Baión ofrece as súas instalacións para o decorrer de eventos como vodas, congresos, ceas de empresas... Os seus espectaculares salóns e xardíns xunto cun equipo de profesionais, conforman o marco perfecto para que nada falle nunha data sinalada. Programa social O terceiro piar deste proxecto camiña, como todo en Pazo Baión, cara a esa forma de facer as cousas dun modo diferenciador. O compromiso social. 5% das vendas logradas en Pazo Baión destínanse a programas de prevención contra as drogas. Paralelamente, a adega leva a cabo cada ano un notábel esforzo para colaborar na reinserción sociolaboral de ex drogodepenentes. Unha contribución de enorme valor colectivo.